МАН-ын гишүүд Засгийн газрын бодлогын эсрэг суртал, ухуулга хийж, сөрөг хүчний байр сууринаас хандсаар байвал ёс зүйн хариуцлага хүлээлгэнэ гэж УИХ дахь АН-ын бүлгийн дарга нар ээлж дараалан мэдэгдсэн. Ёс зүйн хариуцлага гэдэг нь МАН-ын сайд нарыг огцруулах хэмжээний асуудал гэдгийг тодотгож болно. Тухайлбал, тус бүлгийн дарга Б.Гарамгайбаатар өнгөрсөн даваа гаригт мэдээлэл хийх үеэрээ “МАН-ынхан албан тушаалд хүнээ тавих тал дээр маш сайн ажиллаж, гэрээгээ биелүүлсэн. Харин тулгамдсан асуудлыг шийдвэрлэх тал дээр гэрээгээ биелүүлээгүй. Тиймээс хоёр намын Засагт хамтарсан гэрээг эргэж харах шаардлага бий болсон” гэж хэлсэн билээ.

Энэ дагуу тус намын Гүйцэтгэх зөвлөл өчигдөр хуралдаж, Засгийн газарт хамтарсан гэрээг нягтлах тогтоол гаргажээ. Уг тогтоолд “АН-аас Засгийн газарт хамтарч ажиллахаар улс төрийн намуудтай байгуулсан гэрээний биелэлтийг яаралтай дүгнэж, Гүйцэтгэх зөвлөлд танилцуулахыг УИХ дахь АН-ын бүлэгт даалгасугай” гэсэн байна.

Мөн АН-ын бүлгийн дарга Б.Гарамгайбаатар, МАН-ын бүлгийн дарга С.Бямбацогт нар албан ёсоор уулзаж энэ талаар санал солилцжээ. Харин хоёр талын ажлын хэсэг өнөөдөр уулзаж гэрээний хэрэгжилтэд дүгнэлт хийн МАН-ын сайд нарыг огцруулах эсэх асуудлыг ярилцаж, дүгнэлт гаргах юм байна.

МАН-ын бүлгийн гишүүд сүүлийн саруудад Засгийн газрын бодлогын эсрэг мэдээлэл хийж, хэвлэл мэдээллээр хэт нэг талыг барьсан эрх баригчдыг буруутгасан мэдэгдлүүдийг хийж байсан билээ. Хамгийн сүүлд л гэхэд тус намынхан Архангай аймагт ажиллахдаа Засгийн газрыг муулсан гэж буй. Үүнд нь АН-ынхан эгдүүцэж тус намын сайд нарт нь хариуцлага тооцох хүртэл арга хэмжээг ярих болсон нь энэ аж.

Т.Хулан