АНУ-ын Элчин сайдын яамнаас мэдэгдэл гаргажээ. Мэдэгдэлд "Америкийн Төрийн Департаментын Консулын албаны визний системд техникийн саатал гараад байна. Энэхүү техникийн саатал нь тодорхой нэг улс, иргэншлийн бичиг баримт, эсвэл визний төрлөөс үл хамааралтай юм. Бид ийм хүндрэл учруулж байгаадаа хүлцэл өчөөд энэ асуудлыг шийдвэрлэж бүрэн ажиллагаанд оруулахаар яаравчлан ажиллаж байгаа болно. Мөн 2015 оны 5 дугаар сарын 24-өөс 6-р сарын 14-ний хооронд өгсөн АНУ-ын паспортын анкет энэхүү техникийн асуудалд хамаарагдаж байгаа. Хэрэв та энэ хугацаанд АНУ-ын паспорт авах анкетаа өгсөн бөгөөд ирэх ажлын 10 өдөртөө багтаж аялах төлөвлөгөөтэй байгаа бол яаралтай паспорт авах хүсэлтээ анх паспортын анкет мэдүүлсэн газартаа хандаж гаргана уу. Яаралтай паспорт хүсэх тухай мэдээллийг энэ хаягаар орж харна уу.

Энэ системийн асуудал АНУ-ын визны процесст нөлөөлж байгаа бөгөөд 2015 оны 6-р сарын 15-аас хойш батлагдсан цагаачлалын болон цагаачлалын бус визийг хэвлэх боломжгүй байна. Түүнчлэн 2015 оны 6-р сарын 09 болон түүнээс хойш бөглөсөн цагаачлалын бус визний анкетыг АНУ-ын ЭСЯ/Консулын газрууд процесс хийх боломжгүй байгаа. 2015 оны 6-р сарын 09-өөс өмнө DS-160 анкетаа бөглөсөн цагаачлалын бус виз мэдүүлэгчид авсан цагийнхаа дагуу ярилцлагандаа орж болно. Яаралтай явах шаардлагатай хүмүүс Визний ярилцлагын цаг урагшлуулах журмын дагуу хүсэлтээ тавина уу" гэжээ.

Д.Ундрах /24tsag.mn/