УИХ дахь “Шударга Ёс” эвслийн бүлгээс энэ сарын 03-ны өдөр “Оюу толгойн далд уурхайн бүтээн байгуулалт, санхүүжилтийн төлөвлөгөө”- нд Монголын эрх ашигт сөргөөр нөлөөлөх заалт их байгаа тул 14 хоногийн дотор өөрчлөлт оруулж, УИХ-д танилцуулахыг Засгийн Газраас шаардсан. Засгийн газраас уг шаардлагад хариу өгөөгүй тул “Шударга Ёс” эвслийн бүлгээс өнөөдөр мэдэгдэл гаргажээ.

Энэ талаар өнөөдөр тус бүлгийн гишүүн Г.Уянга, Л.Цог, З.Баянсэлэнгэ нар мэдээлэл хийлээ.

Уг мэдэгдэлд “Оюу толгойн далд уурхайн бүтээн байгуулалт, санхүүжилтийн төлөвлөгөө”-ний талаар нээлттэй хэлэлцүүлэг явуулж, иргэд, эрдэмтэн, судлаачид, төрийн болон төрийн бус байгууллагын саналыг сонсох ажлыг зохион байгуулж, УИХ-аар хэлэлцэх ёстой гэжээ. Мөн Гэрээний 5.6 дахь зүйлээр “зээлийн санхүүжилт авахад шаардагдах” барьцаанд Оюу толгой компаний үл хөдлөх хөрөнгийг тавих эрхийг энэ гэрээгээр олгосон байна. Энэ нь Үндсэн хууль, Монгол Улсын Үндэсний Аюулгүй Байдлын Үзэл баримтлал бусад холбогдох хууль эрхийн актуудыг зөрчсөн байх магадлалтай. Тиймээс энэхүү гэрээнд гарын үсэг зурах эрх олгосон Засгийн газрын эрх бүхий албан тушаалтан, гарын үсэг зурахад оролцсон эрх бүхий албан тушаалтныг холбогдох байгууллагуудаар шалгуулах шаардлагатай гэжээ.

Түүчнлэн “Шударга Ёс” эвслийн бүлэг Оюу толгой төслийг Монгол Улсын хууль, тогтоомжийн хүрээнд хамтран ажиллах талуудад харилцан ашигтай, Монголчуудад өгөөжтэй байх нөхцөлөөр уг гэрээг сайжруулах  байр суурин дээрээ цаашид хатуу зогсох болно хэмээжээ.