Манай нийгэмд хүнийг юу юугүй аваачаад хорьчихдог үзэгдэл газар авч байгаа. Дээр дооргүй шоронжсон нийгмийг хуулийн алдаа мэтээр ярьж байгаа энэ үед Ерөнхийлөгч Ц.Элбэгдоржийн үзэл бодол, үг үйлдэл дутагдаад байсан гэхэд болно. Харин тэрбээр өчигдрийн хэлэлцүүлэгтээ шоронжсон нийгмийн хурцадсан асуудалд  хачир нэмж  орхив.  Түүнийг орц тунг нь тааруулсан гич, соус гаргадгийг хүн бүр мэдэж байгаа. Тиймээс ч амнаас нь унаж буй үгсийг анхааралтай ажиглаж суух хүн олон байв.

Ерөнхийлөгч Ц.Элбэгдорж шоронжсон нийгмийг бий болгож буй хүчин зүйлийг  АТГ гэж шулуухан хэлсэн нь олон нийтэд нэгийг бодогдуулсан биз.

Харин АТГ-ын  хувьд Ерөнхийлөгчөөс хүртэл “цэвүүн цагт цэвүүн үг” сонссондоо итгэж чадахгүй суугаа биз ээ.  Учир нь АТГ-ын хувьд   мөрдөн байцаах эрх үүргээ бусдад шилжүүлж мэдэхээр болоод байгаа цаг үе.  Өөрөөр хэлбэл, тэд соён гэгээрүүлэх, урьдчилан сэргийлэх зэрэг бусад үүргээ илүү ухамсарлаж ажиллах цаг ирж байна аа гэсэн үг.

Гэтэл энэ нь тэдэнд хар дарсан зүүд шиг байгааг учир мэдэх хүмүүс төвөггүй ойлгож байгаа. Тодруулбал, мөрдөн шалгах чиг үүрэг нь алдагдаад ирэхээр өнөөх том эрх дарх нь суларч эхлэх нь дамжиггүй биз ээ.

Харин одоо  хууль санаачилж батлагсдын  санал хаашаа эргэснийг иргэн та төвөггүй ойлгож байгаа байх. Ерөнхийлөгч АТГ-ын эсрэг ингэж үг чулуудаж байна аа гэдэг АТГ-аас  мөрдөн байцаах албыг холдуулж, хуучин байранд нь оруулах нь бараг тодорхой болж байгаа гэсэн үг.

“Авлигатай тэмцэнэ гэдэг ард түмнээ хамгаална гэсэн үг. Хэрэг илрүүлэх нэрээр олон хоног хорьж байцаадаг үйл ажиллагааг таслан зогсоох хэрэгтэй”

Гагцхүү эрх үүргээрээ далайлгаж, хэнд ч дийлдэхээргүй хүчирхэгжиж байсан АТГ-ын зүгээс өөрсдийн эрх үүргээ авч үлдэхийн тулд чамгүй “гүйх” нь хэнд  ч тод харагдаж байгаа юм.

Ийн энэ асуудлын талаар илүү лавшруулан хүргэсээр байх болно.  Харин эцэст нь Ерөнхийлөгчийн хэлсэн үгээр иш татах нь зүйтэй биз ээ.

Д.Дуулим