МАХН-ын Бага чуулганы 86 гишүүн Ерөнхий нарийн бичгийн дарга Г.Шийлэгдамбыгаа огцруулах асуудлыг хөндөөд буй. Тэд намын бага чуулганыг ирэх сарын 06-ны дотор хийхийг шаардаж байгаа юм.  Тэгвэл тус намын Гүйцэтгэх товчоо өчигдөр хуралдаж, уг асуудлаар шийдвэр гаргажээ. Хуралдаанд тус намын дэд дарга Г.Тэрбишдагва, УИХ-ын гишүүн Ч.Улаан, Л.Цог, Гүйцэтгэх товчооны гишүүн У.Доёд, Г.Бямбасүрэн болон оюутны холбооны удирдлагууд оролцсон байна. Тэд уг асуудлыг хэлэлцээд шаардлагыг хүлээн авч тулгамдсан асуудлаа хэлэлцэх нь  зүйтэй гэж үзжээ. Мөн тус намын нарийн бичгийн дарга нар болон гүйцэтгэх товчооны олонх гишүүд тус шаардлагыг намын дүрмийн дагуу байна хэмээн үзсэн байна.  Харин УИХ-ын гишүүн З.Баянсэлэнгэ, Ерөнхий нарийн бичгийн дарга Г.Шийлэгдамба, нарийн бичгийн дарга Лхагвацэдэн, Залуучуудын холбооны дарга Буяннэмэх нар дээрх шаардлагыг шүүмжилж, бага чуулганы гишүүдийг буруутгажээ. Гэхдээ эцсийн шийдвэрийг намын дарга Н.Энхбаяртай зөвшилцөж байж шийдвэрлэх бололтой.

МАХН-ын Бага чуулганы гишүүд энэ талаар ярихдаа “Г.Шийлэгдамба, З.Баянсэлэнгэ нар энэ асуудлаар намын даргад хов хүргэх гэж байна. МАХН-ын дээрх удирдлагууд дүрмээ барьдаг, ажлаа мэддэг бол дүрмийн дагуу тавьсан шаардлагыг хэлэлцэх ёстой. Цаашлаад намынхаа бага чуулганыг хуралдуулж, улс орны байдалд дүгнэлт хийн намынхаа дүрмийн бус үйл ажиллагааг таслан зогсоох зэрэг арга хэмжээ авах ёстой баймаар. Гэтэл тэдэнд тийм ёс суртахуун, улс төрийн соёл байхгүй бололтой юм.  Асуудал ийм байдлаар өрнөвөл тус намын эв нэгдэлд хор хөнөөлтэй бөгөөд   “Шударга бус нам” хэмээн Ц. Нямдоржийн хэлснийг батлана. МАХН-ын дарга Н.Энхбаяр дээрх буруу бодолтой, бүтэлгүй хүмүүсийнхээ хов, ятгалгад урьдын адил автаж, тус шаардлагад тоомжиргүй, хугацаа алдаж хандвал МАХН орших эсэх асуудал ч үүсч болзошгүйг урьдчилан харж үүрэг чиглэл өгөх биз” гэлээ.

Хэрвээ шаардлагыг нь хүлээн авахгүй бол дараагийн тэмцэлд ч орж магадгүй аж.

Т.Энхэлээ