МАН-ын Ерөнхий нарийн бичгийн дарга Ж.Мөнхбат мэдээлэл хийж, сүүлийн үед хэвлэлээр гараад буй “МАН-ыг Засгаас хөөнө”, “Ардчилсан намынхан МАН-тай хамтарсан гэрээгээ эргэж харахаар болсон” гэх мэт мэдээлэлд хариулт өглөө.

Тэрбээр МАН-ыг Засгаас хөөсөн зүйл байхгүйг албан ёсоор мэдэгдээд “Энэ бол АН-ын ээлжит шоу. Сүүлийн үед АН-ын рейтинг унаж, МАН-ынх өсч байгаа. Тийм болохоор тус нам ингэж жижиг асуудлаар улс төржиж байна. МАН-ын сайд нар чадлаараа ажиллаж байна. Хүндэрсэн эдийн засгийг сэргээхээр Ж.Эрдэнэбат сайд өдөр, шөнөгүй ажиллаж байгаа. Д.Оюунхорол сайд Зайсангийн иргэдийн газрын асуудлыг шийдвэрлэж чадлаа. Долларын ханш буурч байна. Энэ мэт эерэг өөрчлөлтүүд гарч байгаа. Бүх зүйл өргөс авсан мэт нэг өдөр засагдана гэж байхгүй. Манай намын хувьд хууль бус зүйлийг дуугуй хараад сууж чадахгүй. Бид Засгийн газарт хамтрахдаа “Засагт хамтарлаа гээд хууль бус зүйлийг хараагүй юм шиг өнгөрч чадахгүй гэж хэлсэн. Тиймээс иргэдийн эрх ашгийг зөрчсөн ажлуудыг шүүмжилж, засч залруулна. Ер МАН-д зургаан сайдын суудал өгчихөөд амыг нь таглана гэж бодсон бол эндүүрэл. Бид хэлэх зүйлээ хэлнэ” гэсэн юм .

Мөн МАН бус АН ажлыг гацааж байгаа. Малчдын тэтгэврийн насыг наашлуулах хуулийн төсөл, Тэтгэврийн хүүг бууруулах тогтоолын төслийг АН-ын дарга л хэлэлцэхгүй гацааж байна. Эдийн засгийн ил, тод байдлын тухай хууль дахь цагаан захтнуудыг өмөөрсөн заалтаа АН-ынхан л авахгүй гэсэн. Бид үүнийг шүүмжилж эдийн засгийн өршөөлийг албан тушаалтан, эрх мэдэлтнүүдэд бус жирийн бизнесмэнүүдэд үзүүлье гэж байгаа юм.  Үүнийг нь шүүмжилж хэлж байгаа. Өнөөдөр улс төр болон эдийн засгийн том төслүүдийг боловсруулах ажлын хэсгийн ахлагчаар АН-ын гишүүд л ажиллаж байна. Тухайлбал, Үндсэн хуулийг боловсруулах ажлын хэсэг, Сонгуулийн тухай хуулийг боловсруулах ажлын хэсэг, Тавантолгойн төслийн ажлын хэсэг гэх мэт бүх ажлын хэсгийг АН-ын гишүүд ахалж байна. Тэд л ажлыг гацааж байна шүү дээ гэв.

Тэрбээр мөн АН-ын бүлгийн дарга Б.Гарамгайбаатар улс төрийн хэрүүл хийхдээ их гарамгай байна. Түүн шигээ Завхан руу хүрэх замаа л гарамгай тавь. Хэрүүл хийж бүх бурууг МАН-д нялзаах гэсний хэрэггүй. Янцаглахыг нь би янцаглаж, үүрэхийг нь чи үүр гэж болохгүй гэдгийг АН-д зориулж хэлье гэлээ.

Т.Хулан