УИХ-ын чуулганы үдээс хойшхи нэгдсэн хуралдаанаар Хөдлөх эд хөрөнгө болон эдийн бус хөрөнгийн барьцааны тухай болон холбогдох бусад хуулийн төслүүдийн анхны хэлэлцүүлгийг хийв.

Тус хуулийн төслүүдийн анхны хэлэлцүүлгийг Хууль зүйн байнгын хорооны энэ сарын 23-ны өдрийн хуралдаанаар хэлэлцээд дэмжсэн. Энэ үеэр ажлын хэсгийн ахлагч Ж.Батзандан, "Энэ төсөл Засгийн газарт нэлээд хэдэн жил, сүүлийн жил гаруй хугацаанд УИХ-аар яригдаж байна. УИХ-ын ажлын хэсэг багагүй судалгаа хийсэн. Олон оронд ийм хууль хэрэгжиж, жижиг, дунд үйлдвэрлэл, бизнес эрхлэгчдийг дэмжихэд чухал хувь нэмрээ оруулсаар ирсэн хууль юм" хэмээн онцолж байсан юм. Тэрбээр хуулиудын төслийн хэлэлцүүлгийн эхэнд танилцуулсан. Хэлэлцэж байгаа асуудалтай холбогдуулан асуулт тавих гишүүд байсангүй. Тиймээс байнгын хорооноос гарсан зарчмын зөрүүтэй саналаар санал хураалт явуулав. Ингээд тус хуулийн төслийг гишүүд дэмжсэн тул дараагийн хэлэлцүүлэгт бэлтгүүлэхээр холбогдох байнгын хороонд шилжүүллээ. Энэхүү хуулийн төслөөр хөдлөх эд хөрөнгө болон эдийн бус хөрөнгийг гэрээний болон гэрээний бус үүргийн гүйцэтгэлийг хангах эх сурвалж болгон барьцаалах, уг барьцааны эрхийг бүртгэх, барьцааны шаардлагыг хангахтай холбогдсон харилцааг зохицуулах юм. Чуулганы хуралдаан товын дагуу Засгийн газраас өргөн мэдүүлсэн Зөрчлийн тухай болон холбогдох бусад хуулийн төслүүдийн анхны хэлэлцүүлгийг хийж байна.