ТТ-н гэрээний төслийг Засгийн газар эргүүлэн татахаар болсныг өчигдөр УИХ-ын дарга З.Энхболд мэдэгдсэн. Засгийн газар уг төслийг засч, сайжруулаад удахгүй УИХ-д өргөн барих аж. Тодруулбал, Л.Эрдэнэчимэг гишүүнээр ахлуулсан ажлын хэсгийн дүгнэлтийг гэрээндээ тусгаад дахин оруулж ирнэ гэсэн. Тэр нь Таван Толгой-Гашуунсухайт чиглэлийн 267 километр төмөр замын 51 хувийг “Монголын төмөр зам” ТӨХК-ийн мэдэлд өгөх. Энэхүү өөрчлөлтийг гэрээнд хийх асуудлыг хөрөнгө оруулагчид сайшаахгүй гэдэг үндэслэлийг М.Энхсайхан сайд хэлээд уг асуудалд оролцохгүй байгаагаа мэдэгдсэн.

Тиймээс одоо уг гэрээг М.Энхсайхан биш С.Баярцогт цаашид хариуцахаар болсон аж. Тэрбээр УИХ-аас Засгийн газарт хүргүүлсэн дүгнэлтийн дагуу бүх асуудлыг цэгцэлж, зүүн чиглэлийн 1300 километр шинэ төмөр зам барихаар болж, санхүүжилтийг нь хөрөнгө оруулагч нар гаргах, Тавантолгой- Гашуунсухайт чиглэлийн 267 километр төмөр замын 51 хувийг “Монголын төмөр зам” ТӨХК- ийн мэдэлд өгөх гэсэн заалтуудыг гэрээний төсөлд шигтгэж өгсөн байна.

Т.Сар