Зөвлөлтийн нэрт тенор дуучин Сергей Лемешевийн шавь, Монголын шинэ үеийн дууны урлагийн загалмайлсан эцэг, Хөдөлмөрийн баатар, Ардын Жүжигчин, профессор Гонгорын Хайдав таалал төгслөө.

Тэрбээр анх наймхан настай, хөдсөн дээлтэй хүү Ленин клубийн тайзан дээр орос дуу дуулж олныг гайхшруулж байжээ. Тэр цагаас эхлэн өнөөдрийг хүртэл урлагийн алтан тайзан дээрээ энгүй сайхан хоолойгоороо эгэл олноо баярлуулсаар ирсэн билээ.

Г.Хайдав нь 1925 онд одоогийн Дундговь аймгийн Дэлгэрхангай сумын нутагт төржээ. Тэрбээр Монголын анхны дуурийн дуучдын нэг бөгөөд уянгалаг, цээл “тенор” хоолойгоороо Монголын болон дэлхийн томоохон романс, ари, дууриудыг дуулсан ард түмний хайртай дуучин билээ.

1933 онд Их Хүрээнд буюу нийслэл хотод бяцхан хүү хөдөөнөөс ирж, идэр залуу насандаа хэвлэлийн үйлдвэрт үсэг өрөгчөөр анх ажиллаж байгаад сайн дурын уран сайханч болж, 1947 онд анх зохиогдсон дуучдын уралдаанд оролцож түрүүлснээр дуучин болох зам нь мөрөө тэгшилжээ.

Орчин цагийн анхны театр болох Бөмбөгөр ногоонд жүжигчнээр орохын тулд дөрвөн ч удаа шалгалт өгч байж Ардын зураач Л.Гаваагийн туслах зураач болсон гэдэг.

Мөн тэрбээр өнөөгийн Соёл урлагийн их сургуулийг байгуулах ажлыг анхлан санаачилж, 1963 онд Дуурийн театрын дэргэд байгуулж байлаа. Учир нь тухайн үед тэрбээр Дуурийн театрт ажиллаж байжээ. Анхлан анги танхим гэх юм бараг байхгүй байсан бөгөөд хоосон танхим, цонхны тавцан дээр хичээлээ эхэлж байжээ. Түүний анхны шавь нь МУАЖ Д.Жаргалсайхан бөгөөд 16 настайдаа түүн дээр ирж байсан аж.  Түүнээс хойш оолон арван шавь нартай болсон нь МУГЖ У.Далантай, Х.Үнэнхүү, С.Жавхлан нар юм.  Түүний хүү Х.Төмөрбаатар Монголын эстрадын суурийг тавьсан анхдагч нарын нэг юм.

Түүний гэгээн замаар Монголын урлагийн хойч мөнхөд замнах болно. Ум сайн амгалан болтугай.

Л.Сайнбаяр