Өнөөдөр Олноо өргөгдсөн Монгол Улс байгуулагдсаны 107 жилийн ой тохиож байна. Түүхийн хуудсаас сөхвөөс, 1911 оны арванхоёрдугаар сарын 29-ний энэ өдөр Чин Улсын засаг захиргааг түлхэн унагаж, VIII Богд Жавзандамба хутагтыг хаан ширээнд залан төрийн тусгаар тогтнолоо сэргээж байв. Мөн Ерөнхий сайд, Халхын Сайн ноён хан Т.Намнансүрэн тэргүүтэй анхны таван яам бүхий Засгийн газрыг байгуулсан юм.

Үүний нэг нь Сангийн хамаг хэргийг бүгд захиран шийтгэгч яам бөгөөд анхны тэргүүн сайдаар Түшээт хан аймгийн чуулганы дарга, түшээ гүн Г.Чагдаржав томилогдсон байдаг. Түүнчлэн Гадаад хэргийг эрхлэн шийтгэх яамны сайдаар Түшээт хан аймгийн жанжин, засаг, хошой чин ван Ханддорж, Дотоод хэргийг бүгд захиран шийтгэгч яамны сайдад Их хүрээний да лам Цэрэнчимэд, Цэргийн хэргийг бүгд захиран шийтгэгч яамны сайдад Сэцэн хан аймгийн хамаарсан жанжин, засаг, бэйс Гомбосүрэн, Шүүх таслах хэргийг бүгд захиран шийтгэгч яамны сайдаар Түшээт хан аймгийн улсад туслагч гүн, засаг Намсрайг тус тус томилсон байдаг.

Б.Лхам