ШӨХТГ-аас өнгөрсөн оны арванхоёрдугаар сарын 26-ны өдөр шатахуунд хийсэн хяналт, шалгалтаар зөрчил илэрсэн талаар мэдээлэл хийсэн. Тодруулбал, “Шатахуун импортлогч компаниудын борлуулж буй шатахууны чанар, стандартад өнгөрсөн наймдугаар сараас эхлэн хяналт, шалгалт хийхэд АИ-92 автобензин стандарт, шаардлага хангахгүй болох нь тогтоогдсон. Тухайлбал, “Петростар”, “Магнай трейд”, “Шунхлай трейдинг”, “Содмонгол групп”, “М-Ойл групп”, “Жаст-Ойл”, “Синчи-Ойл”, “Монсуль”, “Ойн бирж” зэрэг шатахуун импортлогчдын АИ-92 автобензинд марганецын агууламж байх ёстой хэмжээнээс их гэж гарсан. Мөн актоны хэмжээ тоондоо хүрэхгүй байгаа нь илэрсэн” хэмээн мэдээлсэн юм. Эдгээр зөрчил илэрсэн учраас тус компаниудад зөрчлөө арилгах шаардлага тавьж, торгуулийн арга хэмжээ авсан бөгөөд удаа дараа зөрчил гаргасан “Магнай трейд” ХХК-н эрхийг нь цуцлах хүртэлх арга хэмжээг холбогдох байгууллагад шилжүүлж ажиллаж байна гэж мэдэгдэж байв.

Тэгвэл Гаалийн ерөнхий газрын Төв лабораторийн дарга, гаалийн итгэмжит зөвлөх С.Цэрэнчимэд манай сайтад ярилцлага өгөх үеэрээ “Бензинд агуулагдах  марганецийн хэмжээ гэж бий. Үүнийг байх ёстой хэмжээнээсээ их, бага байна уу гэдгийг л шалгах ёстой. Нөгөөтэйгүүр, маргенцийг бензин дээр нэмдэггүй. Харин  октаны тоог нэмэгдүүлэгч бодисыг нэмж бензиний чанарыг сайжруулдаг. Сүүлийн үед арай бензин болоогүй завсрын бүтээгдэхүүн их хэмжээгээр оруулж ирдэг болсон. Үүнийгээ сайжруулж бензин үйлдвэрлэдэг. Харин улсын хилээр нэвтрүүлдэг бензиний хувьд хольцтой бензин байхгүй. Тиймээс дотооддоо үйлдвэрлэсэн бензин нь чанарын шаардлага хангаж байгаа эсэх, үйлдвэрлэсэн бүтээгдэхүүнээ хаагуур борлуулж байгаа эсэхэд тавих хяналтыг сайжруулах нь зүйтэй” гэж хариулсан юм.

Эндээс үзвэл, Шударга өрсөлдөөн хэрэглэгчдийн төлөө газар болон Гаалийн төв лаборторийн даргын байр суурь зөрж буй юм. ШӨХТГ-аас дахин тодруулахыг хүссэн боловч хариуцсан ажилтан нь гадуур ажилтай байсан тул холбогдож чадсангүй. Тиймээс ШУТИС-ийн Геологи, уул уурхайн сургуулийн багш, газрын тосны инженерийн салбарын дэд профессор, доктор В.Алимаагаас тодруулахад “Дан ганц марганец нэмснээр автобензин чанаргүй болно гэсэн ойлголт байхгүй. Үүнийг нарийн шинжилгээ хийж тогтоох ёстой” гэсэн юм.

Юутай ч ШӨХТГ-ын мэдээлэл хэт нэг талыг барьсан. Шинжилгээний хариуг танилцуулаагүй гэдэг үндэслэлээр шатахуун  импортлогч компаниуд шүүхэд хандахаар болсон тухай эх сурвалж мэдээллээ.

Бид уг асуудлыг эргэн сурвалжлан хүргэх болно.

Б.Лхам