Шүүхийн ерөнхий зөвлөлөөс улсын хэмжээн дэх эрүү, иргэн, захиргааны хэргийн анхан шатны шүүхийн хэргийн хөдөлгөөний судалгааг танилцууллаа. Өнгөрсөн 2018 оны арванхоёрдугаар сарын 1-20-ны хооронд улсын хэмжээн дэх Анхан шатны шүүхүүд нийт 4371 хэрэг, нэхэмжлэл хүлээн авчээ. Үүнээс эрүүгийн 1153 хэрэг, иргэний 3076 нэхэмжлэл, захиргааны 142 нэхэмжлэл хүлээн авсан байна. Хамгийн олон нэхэмжлэл, хэргийг Баянзүрх дүүргийн Иргэн, Эрүүгийн хэргийн анхан шатны шүүх, нийслэл дэх Захиргааны хэргийн анхан шатны шүүх хүлээж авсан нь хамгийн өндөр үзүүлэлттэй гарчээ. Тэгвэл аймгуудын хувьд Төв аймаг дахь Сум дундын Иргэн, Эрүүгийн хэргийн анхан шатны шүүх, Баян-Өлгий аймаг дахь Захиргааны хэргийн анхан шатны шүүх хамгийн олон хэрэг, нэхэмжлэл хүлээн авсан нь өндөр үзүүлэлттэй байна.

Тэгвэл улсын хэмжээнд нийт 4371 хэрэг хянан шийдвэрлэснээс эрүүгийн 1153, иргэний 3076, захиргааны 142 хэрэг хянан шийдвэрлэжээ. Өнгөрсөн арванхоёрдугаар байдлаар Баянгол дүүргийн Иргэний хэргийн анхан шатны шүүх нийт 393 хэрэг, Баянзүрх дүүргийн Эрүүгийн хэргийн анхан шатны шүүх 155 хэрэг хянан шийдвэрлэсэн нь улсын хэмжээнд хамгийн өндөр үзүүлэлт үзүүлжээ.

Эрүүгийн хэргийн анхан шатны шүүхүүд 1119 шүүх хурал товлон зарласнаас 235, Иргэний хэргийн анхан шатны шүүхүүд 3745 шүүх хурал товлон зарласнаас 1337, Захиргааны хэргийн анхан шатны шүүхүүд 425 шүүх хуралдаан товлон зарласнаас 263 шүүх хуралдаан хойшилжээ. Шүүх хуралдаан хойшилсон судалгаанаас үзвэл, Баянгол дүүргийн Иргэний хэргийн анхан шатны шүүхэд 243, Баянзүрх дүүргийн Эрүүгийн хэргийн анхан шатны шүүх 133, нийслэл дэх Захиргааны хэргийн анхан шатны шүүх 212 хэргийн шүүх хуралдаан хойшилсон өндөр үзүүлэлттэй байна.

Харин хугацаа хэтрэлтийн хувьд улсын хэмжээнд нийт 6248 хэрэг хянан шийдвэрлэх ажиллагаанд байгаагаас 851 хэрэг буюу 13.6 хувийг нь хугацаа хэтэрсэн хэрэг эзэлж байна. Тодруулбал, Хан-Уул дүүргийн Иргэний хэргийн анхан шатны шүүх 149, нийслэл дэх Захиргааны хэргийн анхан шатны шүүх 140 хэргийн хугацаа хэтрэлттэй байгаа нь хамгийн өндөр үзүүлэлттэй байна.