“Охид, эмэгтэйчүүдийн эрхийг хамгаалах” төрийн бус байгууллага болон талийгаач Ч.Чамин-Эрдэнийн гэр бүлээс өнөөдөр мэдээлэл хийлээ.

Тодруулбал, “Боловсрол” суваг телзевизийн MNTM нэвтрүүлэгт оролцогч Ч.Чамин-Эрдэнэ нь өнгөрсөн оны аравдугаар сарын 24-ний өдөр 10.00 цагт гэрээсээ гараад 16.00 цагт нас барсан байдалтай олдсон байдаг. Уг хэргийн талаар “Охидын түүх” төрийн бус байгууллагын гүйцэтгэх захирал Э.Цэцэгсайхан “Талийгаачийн ар гэр ам бүл цөөнтэй. Ний нуугүй хэлэхэд хамт загвар өмсч байсан найзуудаас нь холбогдоогүй. Үрээ алдсан эх хүний зовлонг ойлгож бид нэгдэх ёстой. Хэргийн талаар тодорхой мэдээлэл өгөх боломжгүй. Хуулийн байгууллагынхан дүгнэлтээ гаргаж байгаа. Олзууршуухтай зүйл нь хэрэг хаагдах шатандаа явж байна гэх мэдээлэл гарсан шүү дээ. Энэ нь сэргээгдэхээр болсон. Цагдаагийн ерөнхий газрын дарга болон Хууль зүй, дотоод хэргийн сайд энэ хэргийг мөн анхааралдаа авч ажиллаж байна. Мөн 13 настай охины хэргийг өмгөөлсөн өмгөөлөгчийн багт хүсэлт тавьсан. Ингэснээр шинэ өмгөөллийн багтай болж чадсан. Учир нь уг хэргийг өмгөөлж байсан өмгөөлөгчид нь урьдчилгаа мөнгө аваад алга болсон юм билээ. Сэтгэл санааны хүнд дарамтанд орсон эхийн мөнгийг буцааж өгөөч” гэв.  

Тэгвэл талийгаачийн найз залуу болох н.Нэмэхбаяр нь талийгаачийг амь насаа алдсаны дараагаас холбоогүй болсон гэлээ. Энэ талаар талийгаачийн ээж Г.Чимгээ “Миний охин 16 настайгаасаа н.Нэмэхбаяртай үерхсэн. Гэтэл тэр хүүхэд одоо хаачив. Холбоогүй алга болсон. Би гарцаагүй хэрэгтэн гэж сэжиглэж байгаа. Гэтэл цагдаагийн байгууллагаас тэр хүнийг хэрэгт ямар ч холбоогүй гэж үзсэн. Э.Одонтунгалаг, н.Нэмэхбаяр нарыг би уучлахгүй. Охиныхоо амийг нэхнэ. Цагдаагийн байгууллагын зүгээс охиныг минь амиа хорлосон хэмээн үзэж хэргийг хаахаар оролдож байна. Би үүнтэй санал нийлэхгүй. Яаж ч бодсон 20 см хэмжээтэй цонхоор хүн багтахгүй. Гэтэл охиныг минь амиа хорлосон болгож гүтгэж байна. Э.Одонтунгалаг дарамталдаг байсан тухай охин минь надад хэлж байсан. Би охиндоо итгэдэг” гэлээ.

Б.Лхам