Засгийн газрын өнөөдрийн хуралдаанаар Г.Элбэгсайханыг Хууль зүй, дотоод хэргийн дэд сайдаар томиллоо. Г.Элбэгсайхан нь 1998 онд МУИС-ийн Хууль зүйн дээд сургууль, 2006 онд Английн Эксетерийн их сургуулийг тус тус төгссөн. Англи, орос хэлний мэдлэгтэй. 1998-2001 онд “Балко” ХХК-д хуулийн зөвлөх, 2001-2012 онд Хууль зүй, дотоод хэргийн яаманд мэргэжилтэн, газрын дарга, 2012 онд Гадаадын иргэн, харьяатын газрын дэд дарга, 2013-2017 онд Шүүхийн шийдвэр гүйцэтгэх ерөнхий газарт хэлтсийн дарга, газрын дарга, дэд даргаар ажиллаж байсан бөгөөд 2017 оноос Шүүхийн шийдвэр гүйцэтгэх ерөнхий газрын Тэргүүн дэд даргаар ажиллаж, төрийн албанд тэр дундаа хууль эрхзүйн салбарт  тасралтгүй 18 жил ажилласан туршлагатай юм. Засгийн газрын өнөөдрийн хуралдаанаар мөн Зам, тээврийн хөгжлийн яамны Төрийн нарийн бичгийн даргаар С.Батболдыг томилсон бол Эрүүл мэндийн яамны Төрийн нарийн бичгийн даргаар Б.Бямбадорж, Засгийн газрын хэрэгжүүлэгч агентлаг Архивын ерөнхий газрын даргаар С.Энхбаатар нарыг томиллоо.

Г.Нацаг