Үндэсний Аюулгүй байдлын зөвлөл өнөөдөр 16.30 цагаас хуралдахаар болжээ. Энэ талаар УИХ-ын гишүүн Т.Аюурсайхан "Ерөнхийлөгч Үндэсний Аюулгүй байдлын зөвлөлийг тэргүүлдэгийн хувьд тус зөвлөлийн гишүүдэд зар хүргэж, 16.30 цагаас үүсээд байгаа нөхцөл байдалтай уялдуулж Үндэсний Аюулгүй байдлын зөвлөлийг яаралтай хуралдуулъя гэж сая шийдлээ" гэв.
-Үндэсний Аюулгүй байдлын зөвлөл хуралдтал жагсаал үргэлжлэх юм уу?
-Одоо бид гарч УИХ-ын даргын өгсөн хариуг хэлээд жагсаал цуглааныг тараахгүй бол энэ олон хүнийг барихад хэцүү болно. Бид тэмцлийн дараагийн хэлбэрээ түрүүн хэлсэн. Тэр дагуу жагсаал цуглаан зохион байгуулах журмыг зөрчилгүй Сүхбаатарын талбайн урд талын авто зогсоолд гэр барих зөвшөөрлийг шийдэж өгөөч гэсэн. Мөн улс төрийн хугацаагүй суултаа зарлая, МАНАН бүлэглэлийг унагаахыг дэмжиж буй хүмүүсийн гарын үсэг цуглуулах хөдөлгөөн өрнүүлье гэдэг зүйлийг сая ярьлаа.
-Тэгвэл жагсаал дуусч байна гэж ойлгож болох уу?
-Гадаах хүмүүсийг яаж тайван тараах вэ гэдгийг бодох ёстой. Өмнө нь 2008 онд иймэрхүү жагсаал юунд хүрснийг та бүхэн мэдэж байгаа. Манай зарим гишүүдийн сая авсан мэдээллээр нэр бүхий хүмүүс жагсаал цуглааныг далимдуулж нийтийн эмх замбараагүй байдал үүсгэе. Энэ нь эргээд УИХ-ын даргыг суудалд нь үлдээх арга байж болох юм гэсэн мэдээлэл явж байна. Бид үүнийг баталгаатай мэдэхгүй байна. Сая Ерөнхийлөгч үүнийг их эмзэг хүлээж авлаа. Туслах, Тамгын газрын даргаа яаралтай дуудаж 16.30 минутаас Ерөнхий сайд, УИХ-ын дарга хоёрыг Үндэсний аюулгүй байдлын зөвлөлийн хуралдаанд ирэхийг хэлүүлсэн байна.
-Сая Ерөнхий сайдын өрөөнд Ерөнхийлөгчтэй уулзсан гэсэн үг үү?
-Үгүй ээ. Ерөнхийлөгч Ерөнхий сайдыг дуудуулж байна.
Р.Хишигжаргал
