Хүүхэд бүр хүсэл мөрөөдөл, аз жаргал, хайраар бялхсан орчинд амьдрах боломж өнөөгийн нийгэмд хомс ч гэлээ бага атугай гэрэл гэгээ нэмж, бага атугай хайр, инээд хөөр бэлэглэх хүсэл эрмэлзлээр дүүрэн хүмүүс цөөнгүй бий. Тэдний нэг бол УИХ-ын гишүүн Х.Нямбаатар болон “Вэлүү” сангийн тэргүүн Канад Улсын иргэн, хатагтай Жули Вэлүү нар юм. Эдгээр эрхэм хамтарч Улаанбаатар хотын хамгийн эмзэг цэгийн нэг болох Улаанчулуут дахь балчир үрсэд туслахаар шийдснээс хойш өдгөө хоёр дахь цэцэрлэгээ яг одоо нээж байна. Тэдний байгуулсан хамгийн анхны цэцэрлэг бол “Нарны хүүхдүүд-1” цэцэрлэг. Тус цэцэрлэгээр дамжуулж, 150 бяцхан үрсийн амьдралд өнгө оруулж, ирээдүйгээ өнгөлөгөөр харах боломжийг нээж өгч байсан бол өнөөдөр дахин 200 хүүхдийн ирээдүйд тэмүүлэх хүсэл мөрөөдлийг нь ийн аварлаа.

Өнгөрсөн 2018 оны дөрөвдүгээр сараас барилгын ажил эхэлсэн тус цэцэрлэгээ анх 1.2 тэрбум төгрөгөөр босгохоор төсөвлөсөн ч гадна тохижилтоос бус ажилд нэг тэрбум төгрөг л зарцуулснаа өнгөрөгч арваннэгдүгээр сард Х.Нямбаатар, хатагтай Жули Вэлүү нар мэдээлж байсан юм. Тэгвэл эдүгээ цэцэрлэгийн тохижилт бүрэн дуусаад зогсохгүй тун удахгүй хаяандаа халуун ус, тэр бүү хэл сургалтын төв байгуулахаар болсон байна. “Нарны хүүхдүүд-2” цэцэрлгийг байгуулах хөрөнгийг “Нарны хүүхдүүд-1”-тэй яг ижилхэн нөхцлөөр буюу гадна, дотнын хандивлагч байгууллага, иргэдийн тусламжаар 100 хувь шийджээ.

Ийнхүү Улаанчулуут дахь бяцхан үрсийн Нарны диваажин нээлтээ хийлээ. “Нарны хүүхдүүд” диваажинд мянга мянган үрсийн сэтгэлд гэрэл гэгээ нэмж, ирээдүйдээ итгэл төгс, улам бадрангуй сэтгэлээр тэмүүлэх сэтгэлийг дэм хайрлах болтугай гэж ерөөе. 

Г.Нацаг