Гэр бүл, хүүхэд, залуучуудын хөгжлийн газраас өнөөдөр хурдан морь унаж яваад хоёр гараа хөлдөөсөн хүүгийн талаарх мэдээлэлтэй холбоотойгоор мэдээлэл хийлээ.
Энэ үеэр “Засгийн газрын 57 дугаар тогтоол гарснаас хойш хурдан морины уралдаан зохион байгуулагдсан мэдээлэл ирээгүй. Хэнтий аймгийн Биндэр суманд хурдан морины сунгаа зохион байгуулж, хүүхэд хоёр гараа хөлдөөсөн хэрэг гарсан эсэх талаар бид орон нутаг дахь мэргэжилтнүүдтэйгээ холбогдож тодруулсан. Мэргэжилтнүүд Хэнтий аймгийн Засаг даргаас “аймгийн хэмжээнд ямар нэгэн уралдаан зохиогдоогүй гэсэн албан тоот ирүүлсэн” гэлээ. Тэгвэл тус газрын хууль эрх зүй, хамтын ажиллагааны газрын дарга А.Энхбаатар “Техник технологийн хөгжил зарим төрлийн гэмт хэргийг цаг алдалгүй мэдээллэх давуу талыг бий болсон. Нөгөө талаасаа ташаа мэдээлэл тархах боллоо. Тухайн хүүхэд шинийн 1-нд золголт хийж байгаад саахалтын айлд ахынх нь мотоциклын шатахуун дууссан тул ах руугаа гар чийдэн бариад явсан байна. Энэ үеэр гар нь хайрагдсан тул маргааш нь сумынхаа эмнэлэгт үзүүлж, анхан шатны тусламж авсан гэсэн. Тэр үед сумын эмч нь хот руу очиж үзүүл гээд явуулсан юм билээ. Ингээд вагонд явж байхад нь зөвшөөрөлгүйгээр зураг авч, ташаа мэдээлэл тараасан байна.
Тухайн хүүхдийн ээжтэй холбогдож тодруулахад Сэлэнгэ аймагт золголуултаар явж байна гэсэн. Зөвшөөрөлгүй зураг авч олон нийтийн сүлжээнд тараасанд гомдолтой байгаагаа хэлсэн. Хүүгийн биеийн байдал одоо хэвийн болсон. Удалгүй тэдэнтэй уулзаж мэдээлэл авна. Маргааш Алтанбулаг сумаас аймгийн төв дээр ирэхээр нь хүлээн авч уулзаж, эмнэлгийн үйлчилгээнд хамруулж, шаардлагатай тохиолдолд нарийн мэргэжлийн эмнэлэгт зуучлах болно. Хүүхэд зургаан настай, Хэнтий аймгийн төвийн ойролцоох сумын сургуулийн нэгдүгээр ангид суралцдаг. Цаашид ийм төрлийн мэдээллийг хариуцлагатай, үнэн зөв эх сурвалжаас авч мэдээллэхгүй бол Зөрчлийн тухай хуулиар шийтгүүлэх магадлалтайг хэлмээр байна” гэлээ.
Р.Хишигжаргал
Сэтгэгдэл (1)