Элсэлтийн ерөнхий шалгалтын онлайн бүртгэл өнөөдөр эхэлж байгаатай холбогдуулан Боловсролын үнэлгээний төвөөс мэдээлэл хийлээ.

Тодруулбал, элсэлтийн ерөнхий шалгалтын бүртгэл өнөөдрөөс ирэх дөрөвдүгээр сарын 15-ны өдрийн 18.00 цаг хүртэл үргэлжлэх юм байна. Энэ талаар Боловсролын үнэлгээний төвийн захирал Ж.Ган-Эрдэнэ “Монгол хэл, бичгийн шалгалтын босго оноонд хүрээгүй бол их, дээд сургуульд элсэн суралцах боломжгүй. Шалгалтаар босго оноонд хүрээгүй байсан ч бусад хичээлийн шалгалтаа өгөх эрх нээлттэй байна. Хэрвээ монгол хэл, бичгийн шалгалтын онооноос бусад хичээлийн шалгалтын оноо нь их, дээд сургуулийн болзлыг хангасан бол ирэх жил шалгалт өгч тэнцснээр их сургуульд элсэн суралцах боломжтой болно” гэв.

Мөн монгол хэл, бичгийн шалгалтын агуулгын 25 хувь нь эх найруулан бичих, 25 хувь нь монгол бичгийн даалгавар байх аж. Монгол хэл, бичгийн шалгалт үнэ төлбөргүй бол бусад хичээл тус бүр нь 5800 төгрөгийн төлбөртэй юм байна.

Хөгжлийн бэрхшээлтэй шалгуулагчдад зориулан тусгай байр бэлдэнэ. Энэ жилийн хувьд урьдчилсан байдлаар 20 мянган сурагч шалгуулах юм байна. Монгол хэл, бичгийн шалгалт 400 босго оноотой бөгөөд шалгалт ирэх сарын 23-ны өдөр явагдахаар болжээ.

Б.ЛХАМ