Энэ сарын 8, 9, 10-ны өдрүүдэд Хан-уул дүүргийн XI дүгээр хороонд байрлах KFC-Зайсан салбараар үйлчлүүлсэн 16 иргэн хордлогод орж ХӨСҮТ-д хэвтэн эмчлүүлж буй. Олон арван иргэд хордлогод орж, эрүүл мэндээрээ хохирчихоод байхад KFC сүлжээ хоолны газрын удирдлагууд нүдэн балай чихэн дүлий суусаар байна. Хордлого юунаас ч болсон байж мэднэ.

Гэхдээ нэг байгууллагаар үйлчлүүлсэн өөр өөр гэр бүлийн ийм олон иргэн зэрэг өвдсөн нь KFC-гийн хоол хүнс болоод үйл ажиллагаанд ямар нэг асуудал бийг харуулж буй хэрэг юм. Өнгөрсөн 2017 онд тус хоолны сүлжээ газарт мэргэжлийн хяналтын газраас шалгалт хийхэд “БАГА” эрсдэлтэй гэж гарсан бол 2018 оны шалгалтаар “ДУНД” эрсдэлтэй гэсэн дүгнэлт гарчээ.

Тэгвэл энэ 2019 онд KFC сүлжээ хоолныхон шатлалаа ахиулж “ЭРСДЭЛТЭЙ” бүлэгт амжилттай багтснаа эл үйлдлээрээ батлан харуулах шиг боллоо. Дэлхийн олон улсад тус сүлжээ хоолны газрыг нүд үзүүрлэж, бүр хөөн гаргасан байдаг. Гэтэл монголчууд гэр бүл, найз нөхөд, үр хүүхдээ баярлуулах гэж байна гээд дэлхийд адлагдсан хороор хайртуудыгаа баярлуулж суух нь буян биш харин нүгэл гэдгийг ухаж ойлгох хэрэгтэй юм. 

Иргэд юунаас болж хордсон шалтгааны хариу ирэх даваа гаригт гарна. Тэр болтол монголчууд түргэн хоолыг уруул хүрэмгүй амттанаар таашаах уу, эс бөгөөд эрүүл мэндэд хортой хог мэтээр нүд үзүүрлэх эсэхдээ дүгнэлт хийх биз ээ.

Харин олон иргэнийн эрүүл мэндийг эрсдэлд оруулсан хэрэгт буруутгагдаад байгаа KFC-гийнхэн олон нийтээс уучлалт гуйх ёстой баймаар. Гэтэл тэд ингэж ёс зүйн хариуцлага хүлээх нь байтугай зарим хэвлэл мэдээллийн хэрэгслээс мэдээллээ устгуулахын тулд төлбөр төлье гэж хүртэл ярьсан сурагтай. 

Эндээс  үзвэл, сүлжээ хоолны газар нэртэнгүүд улсын хилээр дураараа алхаж орж ирээд, ард түмнийх эрүүл мэндээр тоглож болно гэж бодсон бололтой. Тиймээс холбогдох байгууллагынханд хандаж хэлэхэд энэ мэт үйлдлийг таслан зогсоогооч, хэн нэгний ашиг хонжооноос илүүтэй Монгол Улсын иргэнийн амь нас, эрүүл мэнд чухал шүү гэдгийг нэхэн сануулъя.   

Г.АЛИМАА