KFC сүлжээ хоолны газраар үйлчлүүлсэн иргэд хордлогод орж, улмаар ХӨСҮТ-д эмчлүүлж буй. Тэгвэл үүнтэй холбогдуулан нийслэлийн Мэргэжлийн хяналтын газрын  дарга Л.Эрдэнэчулуун “Өнөөдрийн байдлаар 63 хүнээс шинжилгээ авсан. Үүнээс 45 хүнд нь хордлогын шинж тэмдэг илэрсэн. ХӨСҮТ-д хэвтэн эмчлүүлж байгаа 20 хүн бий. Нийслэлийн Мэргэжлийн хяналтын байгууллагаас нийт 42 дээж авсан. Ирэх даваа гаригт эцсийн байдлаар юунаас болсон эсэх асуудал нь гарна. Урьдчилсан байдлаар гүний худаг дахь уснаас нэг төрлийн E.COLI нян илэрсэн” гэв.

  Тэгвэл эрдэмтэн Н.Сэргэлэн, С.Лхагвасүрэн, Д.Алтангэрэл, Х.Алтанцэцэг нарын “ЭМГЭГ ТӨРӨГЧ E.COLI-ИЙН ХОРУУ ЧАНАРЫН ЗАРИМ СУДАЛГАА”-нд дурьдснаар E.COLI нян буюу гэдэсний бүлгийн эмгэг төрөгч нян бөгөөд уг нянгаар халдварласан тохиолдолд хоруу чанар маш их юм байна.

Өөрөөр хэлбэл, манай улсад хоол хүнсээр дамжсан халдвар, хордлогын эрсдэл нэмэгдсээр байна. Хүнсний халдвар, хордлогыг үүсгэгч нянгийн гол төлөөлөгч нь дээрх нян гэж үздэг байна.

Уг нянгын халдварын тохиолдлуудаас дурьдвал, 2005 оны арваннэгдүгээр сарын 5-нд Өмнөговь аймаг дахь Зэвсэгт хvчний 167-р ангид хордлого гарсан бол, 2008 оны тавдугаар сарын 12-нд Орхон аймгийн сурагчдын номноос гэдэсний савханцар илэрсэн байна.

Мөн 2009 онд нийслэлийн Төмөр замын 4,5-р цэцэрлэгийн хүүхдүүд хоолноосоо хордсон бол 2010 оны аравдугаар сарын 8-нд АНУ-аас импортлосон тахианы маханд дээрх нян агуулагдаж байсан учир буцаах шийдвэр гаргаж байжээ.

 Улсын МХЕГ-ын 2011 оны арваннэгдүгээр сарын 1-ны судалгаагаар голын усанд гэдэсний савханцрын бохирдол 5.8 хувь, E.coli 35.8 хувь илэрсэн байна. Түүнчлэн 2012 онд  “Шинэ Шивээ” ХХК-ний хайгуулын түр сууринд, 2013 онд Баянзүрх дүүргийн оршин суугч Б-ийн таван ам бүлийг хамарсан хордлогын үүсгэгч агуулагдаж байжээ. Энэ бүх хүнсний халдвар хордлогын гол төлөөлөгч нь дээрх болохыг баталж байна гэж дээрх судалгаанд дурьджээ.

    Энэ судалгаанаас үзвэл,  KFC сүлжээ хоолны газрын тахианд дээрх нян агуулагдаж байсан байхыг үгүйсгэхгүй юм.

    Үгүй юм гэхэд НМХГ-ын газрын даргын хэлсэн шиг хэрэглээний ус, эсвэл сав суулга нь өмнө нь бохирлогдсон байсан ч юм билүү, хэн мэдлээ.

     Тиймээс ард иргэдэд хандаж хэлэхэд аль болох түргэн хоолны газраар бүү үйлчлүүл. Эс бөгөөс хордсон иргэдийн араас "ачигдаж" мэдэх нь байна шүү.

Г.Нацаг-Эрдэнэ