Нийслэлийн Мэргэжлийн хяналтын Эрчим хүч /Газрын тос, хийн/ хяналтын улсын ахлах байцаагч Т.Мөнхболдтой ярилцаа.
-Саяхан цайны газар газ дэлбэрсэн гэх мэдээлэл гарсан. Энэ үнэн юм уу?
-Газ дэлбэрсэн гэдэг нь ташаа мэдээлэл. “Монгол зоог” цайны газарт гал гарснаас биш газ дэлбэрээгүй. Тухайн үед гомдол мэдүүлсэн иргэдийн ирүүлсэн зурганд баллонд ямар ч сэв суусан, харласан зүйл байгаагүй. Галын шалтгааныг тогтоохоор Онцгой байдлын Гамшиг судлалын хүрээлэнгээс ажиллаж байгаа. Одоогоор цайны газрын үйл ажиллагааг түр зогсоосон. Тухайн цайны газрын ажилтчдын хэлснээр хуушуур хайрч байхад тос нь плитка руу нь асгарснаас болж гал гарсан гэж тайлбарласан. Энэ талаар Онцгой байдлаас ирэх дүгнэлтийг хүлээж байна.
-Нийслэлийн Мэргэжлийн хяналтаас ямар арга хэмжээ авч ажилласан бэ?
-Тухайн байгууллагад газ хэрэглүүлэхгүй байхаар шийдвэрлэсэн. Журмаараа барилгын суурин давхарт газ хэрэглэхийг хориглодог. Үүнтэй холбоотой асуудлаар нийслэлийн Онцгой байдлын газар, нийслэлийн Прокурорын газартай хамтран шалгалт явуулсан.
-Тэгвэл ийм зөрчилтэй хэчнээн хоол үйлдвэрлэдэг газар байдаг юм бэ?
-Манай байцаагчид дүүргүүдэд хуваагдаж шалгалт хийсэн. Миний хувьд Чингэлтэй дүүргийн ажлын нэгдүгээр хэсэгт ажилласан. Цаг давчуу байсан учраас 30 орчим цайны газарт урьдчилан сэргийлэх шалгалт хийсэн. Шалгалтаар 50 орчим хувь нь шаардлага хангаагүй гарсан тул холбогдох арга хэмжээг авч ажилласан. Мөн шаардлага хангаагүй хэсэгт баллон байрлуулсныг тохирох газар руу нь шилжүүлэх үүрэг даалгавар өгсөн. Түүнчлэн 10 аж ахуйн нэгжид Зөрчлийн тухай хуулиар арга хэмжээ авсан.
-Зөрчлийг арилгуулсны дараа хяналт, шалгалт дахин хийдэг үү?
-Төлөвлөгөөт ажлын хуваарийн дагуу ажилладаг учраас байнга шалгах боломжгүй. Гэхдээ хөндлөнгийн гомдлын дагуу цайны газарт шалгалт хийх эрх бий. Шаардлага хангасан байгууллагуудад улирал тутам зөвлөмж, сэрэмжлүүлэг хүргүүлдэг юм. Мөн хийн баллон борлуулдаг байгууллагуудад “Хангамж хийдэг аж ахуйн нэгжийнхээ баллоны тоног төхөөрөмжийг сайтар шалгаж. Аюулгүй ажиллагааг нь хангуул. Хэрэв чадахгүй бол хариуцлага тооцно” гэдэг зарчмаар ажилладаг болсноос хойш осол аваарын хэмжээ буурсан. Түүнчлэн цайны газрын ажилчдыг сургалтад хамруулдаг болсон.
-Оны өмнө Баянзүрх захад гал гарсан. Гал юунаас болж гарсан юм бол?
-Урьдчилсан байдлаар цахилгаанаас үүдэлтэй гал гарсан болов уу гэж таамаглаж байна. Хэрэв газ дэлбэрснээс болж гал гарсан бол хамгийн надад мэдээлэл ирэх ёстой.
-Өнгөрсөн онд газ дэлбэрсэн тохиолдол гарсан уу?
-Долоо орчим жилийн өмнө Дархан хотод газ дэлбэрснээс хойш дахиж ийм асуудал гараагүй. Сүүлийн үед гарсан галын шалтгаан ихэвчлэн цахилгаанаас хамааралтай гарч байна.
-Нийслэлийн Мэргэжлийн хяналтаас энэ талаар хяналт, шалгалт хийдэг үү?
-Хяналт, шалгалтын ажлыг тогтмол зохион байгуулдаг. Баяр, ёслолын үеэр албан байгууллага, олон нийтийн үйлчилгээний газруудад сэрэмжлүүлэг хүргүүлдэг. Тухайлбал, шингэрүүлсэн шатдаг хийн тоног төхөөрөмжтэй харьцаж ажиллах ажилтанд анхан шатны мэдлэг олгох, аюулгүй ажиллах талаар санамж, зааварчилгаа байршуулах, хамгаалалттай тоног төхөөрөмж суурилуулж, байнгын техникийн хяналт, үйлчилгээг хангах, хий алдагдал мэдрэгч дохиолол суурилуулахад анхаарч ажиллах зөвлөмжийг хүргэдэг.
-Хоол үйлдвэрлэлийн газруудад хэчнээн газ ашиглаж байна вэ. Ийм судалгаа бий юү?
-Улсын хэмжээнд ашигладаг газын 70 орчим хувийг хоол үйлдвэрлэлд хэрэглэдэг. Харин 15 хувь нь автомашин, үлдсэн хувь нь авто засвар, уул уурхай, барилгын салбар, лаборатори болон бусад салбарууд ашиглаж байна. Мөн улсын хэмжээнд 12 орчим мянган цайны газар байдаг гэсэн судалгаа бий. Эдгээр цайны газрын 70 орчим хувь нь өдөр тутамдаа газ хэрэглэдэг. Өөрөөр хэлбэл, хоол үйлдвэрлэлийн салбарт ойролцоогоор 10 орчим мянган газ хэрэглэгдэг.
