KFC сүлжээ хоолны газрын Зайсанд байрлах салбараар үйлчлүүлсэн иргэд хоолны хордлого авСан иргэдээс цусан суулга өвчин үүсгэдэг шигел гэх нян илэрсэн аж. Энэ талаар нийслэлийн Мэргэжлийн хяналтын газрын холбогдох албан тушаалтнууд мэдээлэл хийлээ.

НМХГ-ын дарга Л.Эрдэнэчулуун: ХОЁР АЖИЛТНААС ЦУСАН СУУЛГА ӨВЧИН ИЛЭРСЭН

Өнөөдөр Нийслэлийн удирдах ажилтны ээлжит шуурхай зөвлөгөөн өнөөдөр болж “KFC” түргэн хоолны газрын бүх салбарыг хаахаар болсон. Манай газарт энэ сарын 11-ний өдөр дуудлага ирж, 12-ний өдөр “Зайсан KFC” түргэн хоолны газрыг хаасан байгаа. Тус газарт хоёрдугаар сарын 8-15-ны өдрүүдэд хоол идсэн 116 хүнд ойр ойрхон усархаг гүйлгэх, зарим хүнд бөөлжих, халуурах зэрэг эмнэлзүйн ижил шинж тэмдэг илэрч ХӨСҮТ-д хэвтэн эмчлүүлж байгаа 37, гэрээр эмчийн зөвлөгөөний дагуу эмчлүүлж байгаа 79 хүнд хоолны хордлогот халдварын ижил эмнэлзүйн шинж тэмдэг илэрсэн. Хяналт шалгалтаар бүх зүйлд нян судлалын шинжилгээнд хамруулсан. Хоолны газрын нийт 28 ажиллагчдад шинжилгээ хийхэд хоёр ажилтнаас цусан суулга өвчний халдвартай байсан нь илэрсэн. Мөн ус болон бүтээгдэхүүнээс өвчин үүсгэгч илэрсэн. Эрүүл мэндийн үзлэгийн хуудсыг хуурамчаар үйлдсэн байсан. Өнөөдрөөс тус түргэн хоолны газрын бүх салбарыг хаахаар болсон. Мөн бүтээгдэхүүнийг устгах ажиллагаа явагдах болно. 

Эрүүл мэнд, боловсрол соёлын хяналтын хэлтсийн дарга Д.Цэнд-Аюуш: 242 ХҮНД ЭМНЭЛЗҮЙН ШИНЖ ТЭМДЭГ ИЛЭРСЭН 

Тандалт шалгалтын хугацаанд хоолны 39 бүтээгдэхүүнээс дээж авч шинжилсэн. Мөн эрүүл ахуй, орчин гээд нийт 94 сорьцоос дээж авч шинжилж ажиллаласан. Тухайн салбар 28 ажилтантай. Шалгалтын явцад ажилчдын зарим нь эрүүл мэндийн дутагдалтай, дотоод хяналт тавьдаггүй, мэргэжлийн хяналтын байгууллагаас зөвшөөрөөгүй, ариутгал халдваргүйтлийн бодис хэрэглэсэн байсан. Уг хордлогын улмаас өнгөрсөн хугацаанд нийт 242 хүнд эмнэлзүйн шинж илэрч, 42 хүн эмнэлэгт хэвтэн эмчлүүлж байна” гэв.

Төв лабораторийн эрхлэгч М.Бадамцэцэг: ТАХИАНЫ МАХНААС СЕРАТО ГЭДЭГ БОДИС ИЛЭРСЭН

Энэ сарын 12-ны өдрийн 23.00 цагаас эхлэн нийт 133 дээжийг манай лабораторид шинжилсэн. 133 сорьцын есөд нь эерэг үзүүлэлт гарсан. Ундны уснаас гэдэсний эмгэг төрүүлэгч болон савханцар илэрсэн. Тахианы ясгүй махнаас серато гэх бодис илэрсэн. Гэхдээ зөвшөөрөгдөх дээд хэмжээнээс их биш. Түүхий бүтээгдэхүүнд нянгийн бохирдол байдаг. Халуун боловсруулалт хийсний дараа нян нь устах ёстой. Мөн гурван арчдасаас нян илэрсэн.

Г.Алимаа