“Хэвтүүл” хөдөлгөөнөөс ЖДҮ-чдийн эсрэг жагсаал зохион байгуулах гэж буйгаа мэдээллээ. Тэд “Төрд нүүрлэсэн хулгайчдын үйлдлийг тэвчиж чадахгүй учраас “Хэвтүүл” хөдөлгөөнийг байгуулсан” гэдгээ хэлсэн юм.

Хэвтүүл хөдөлгөөний тэргүүн Э.Тамир “Сүүлийн 5-6 сарын хугацаанд ЖДҮ-чид айдастай байлаа. Гэсэн ч сүүлийн 20-иад хоногоос тэд зориг орж “Хэрэв ЖДҮ-гийн талаар ярих юм бол Зөрчлийн тухай хуулиар торгоно” гэж айлгаж байна. Уг нь тэдгээр хүмүүс 6-7 төрлийн хууль зөрчсөн. Хуулиар 30 гаруй зүйл ангиар шийтгэгдэх гэмт хэрэг хийсэн хүмүүс. Үүнд, Нийтийн ашиг сонирхлын тухай хууль, Авилгын эсрэг тухай хууль, УИХ-ын тухай хууль, УИХ-ын гишүүний ёс зүйн дүрэм, Эрүүгийн хууль, УИХ-ын гишүүний тангараг зэргийг зөрчсөн. Эдгээр гишүүд өөрсдөө ч үүнийг мэднэ. УИХ-ын гишүүд ийм зөрчил гаргасан байвал дэлхийн улс орнуудад өндөр хариуцлага тооцдог. ЖДҮ авсан гишүүд өөрсдийгөө зээл авсан гэж яриад байна. Үнэн хэрэгтээ эд нар зээл аваагүй эрх мэдээлэл, мэдээлэлд ойр байгаагаа ашиглаж, улсаас нэн хөнгөлөлттэй зээлийг авсан. Хэрвээ арилжааны банкнаас авсан бол ямар нэгэн асуудал байхгүй. Бид үүнийг тэвчиж чадахгүй учраас хөдөлгөөн байгууллаа. Бид эрх мэдэлтний “Нэхүүлүүд” биш ард түмний “Хэвтүүлүүд” юм гэдгийг хэлье” гэлээ.

Тус хөдөлгөөний гишүүн Н.Ган-Эрдэнэ “Хэвтүүл хөдөлгөөний зүгээс ЖДҮХС-аас хөнгөлөлттэй зээл авч жирийн иргэд, бизнес эрхлэгчдийн боломжийг хулгайлсан УИХ гишүүд болон бусад төрийн өндөр албан тушаалтны ёс бус үйлдлийг эсэргүүцэн жагсаал цуглааныг зохион байгуулахаар холбогдох байгууллагад бүртгүүлсэн. Уг жагсаалыг ЖДҮ хулгайчдыг хэвтүүл” уриан дор Сүхбаатарын талбайд ирэх сарын 2-ны өдөр 10.00-12.00 цагийн хооронд 500 орчим хүний бүрэлдэхүүнтэй зохион байгуулна” гэв.