Хуульчид цагдан хорих 461 дүгээр хорих ангид амиа алдсан шүүгчийн талаар мэдээлэл хийлээ.

Төрийн тусгай хамгаалалттай газар, Монгол улсын иргэн, төрийн албан хаагч амь насаа алдаж байгаа анхны тохиолдол биш аж.

Энэ талаар хуульч, өмгөөлөгч Г.Оросоо “Сүүлийн үед нийгмийг цочроосон гэмт хэргүүд цуврал гэмт хэрэг шиг гардаг боллоо. Тухайлбал, Зам тээврийн яаманд удирдах албан тушаал эрхэлж байсан хүний амь насыг бүрэлгэсэн, Увс аймгийн хилийн 0311 дүгээр ангийн байлдагч оргож амь насаа алдсан, Дорноговь аймгийн Зүүнбаян сумын цэргийн ангид байлдагч амь насаа алдсан зэрэг хэрэг гарсныг санаж байгаа байх. Уг нь Монгол Улс Үндсэн хуульдаа “Хүмүүнлэг, иргэний нийгэм байна” гэж заасан байдаг. Харамсалтай нь Монголын нийгэмд онц хүнд гэмт хэрэг удаа дараа цуврал байдлаар гарч байна. Өөрөөр хэлбэл, зэрлэгшсэн нийгэм рүү бид явж байна. Энэ нь Монгол Улсын иргэн амьд явах эрхтэй гэсэн заалтууд ноцтой зөрчигдөж байгааг харуулж байна.

Төрийн байгууллагад ажиллаж байгаа хүн гэмт хэргийн золиос болж, төрийн байгууллагын хяналтад очоод саатуулагдан шалгагдаж байгаа хүн амь насаа алдаж хохирч байгаагаас харж болно. Монголын төр Үндсэн хуульд заагдсан эрхийнхээ хүрээнд террорист шиг ажилладаг болчихлоо. Иргэнийхээ үндсэн эрхийг хамгаалж ч чадахгүй байна шүү дээ. Төрийн хяналтанд байгаа мөртлөө амиа алддаг үзэгдэл болж мэт болж хувирсан байна. Монголд хамгийн эрсдэлтэй ажлын байр өнөөдөр  төрийн алба болж, иргэнийхээ үүргийг биелүүлж, цэргийн албанд мордоход ч эрсдэлтэй байдалд байна. Тиймээс эдгээр асуудлаар Үндэсний аюулгүй байдлын зөвлөл яаралтай хуралдаж, зөвлөмж гаргах”-ыг шаардлаа.

Түүнчлэн Цагдан хорих 461 дүгээр анги нь төрийн хатуу хяналтан дор үйл ажиллагаа явуулдаг бөгөөд камер байхгүй эсвэл дутсан зэрэг асуудал байддаггүй аж. Мөн цагдан хорьж шалгадаг арга хэмжээ авна гэдэг нь хүний нэр төр, сэтгэл санаа, гэр бүл, үр хүүхдэд нь хүндээр тусдаг, маш хүнд арга хэмжээ юм. Тиймээс аль болох цагдан хорих арга хэмжээнээс татгалзах хэрэгтэй. Дээр гарсан хэргүүдэд  холбогдох байгууллагууд хариуцлага хүлээх ёстой гэдгийг хуульчдын зүгээс хэлж байлаа.

Б.Лхам