"Монголын хүний төлөө" нам болон “Иргэний шударга шүүх” ТББ хамтран Үндэсний аюулгүй байдлын зөвлөлд шаардлага хүргүүлж буй талаараа мэдээлэл хийлээ.

"Иргэний шударга шүүх" ТББ нь төрийн албан хаагчид тэр дундаа хууль хяналтын байгууллагын албан хаагчдын үйл ажиллагаанд хяналт тавихад чиглэгдсэн байгууллага аж. Тус байгууллага үйл ажиллагаа явуулсан 13 жилийн хугацаанд 10 мянга гаруй иргэдээс гомдол ирүүлсэн бөгөөд 1000 орчим хэрэг дээр өмгөөллийн туслалцаа үзүүлсэн байна.

"Иргэдийн шударга шүүх" ТББ-н тэргүүн Х.Бат-Ялалт "Бидний зүгээс Н.Энхбаярыг Ерөнхийлөгч байх үед ҮАБЗ-д хандаж, шүүхийн байгууллагын үйл ажиллагааны талаарх шаардлагыг анх илгээж байсан. Тэгвэл одоо шаардлагаа дахин хүргүүлж байна. Үндсэн хуульд зааснаар иргэд шударга шүүхээр шүүлгэх эрхтэй. Гэвч шүүхийн байгууллага хүн болгоныг шүүдэг байгууллага боллоо.

Шүүгчийн шийдвэрийг хэн ч хянах боломжгүй болсон. Тодруулбал, гурван шатны шүүх нэг нэгнийхээ шийдвэрийг хянах ёстой байтал эсрэгээрээ хамгаалдаг болсон. Хэрвээ шүүгч хууль бус шийдвэр гаргаж, хууль бус үйлдэл хийсэн тохиолдолд тэднийг хэн шүүж, ямар хариуцлага үүрэх нь тодорхойгүй байна. Эрүүгийн хуулийн шинэчилсэн найруулгаар шүүгч илт, хууль бус шийдвэр гаргасан тохиолдолд шүүгч хариуцлага хүлээхээргүй хуулийн заалттай болгож өөрчилсөн байна.

Гэмт хэрэгтэй тэмцэх үүрэг бүхий хууль хяналтын байгууллагууд үүргээ биелүүлэхгүй байгаагаас болж нийгэм хэсэг бүлэгт хуваагдлаа” гэв.