Ирэх гуравдугаар сарын 1-нээс нийлэг хальсан уутны хэрэглээг хязгаарлахтай холбогдуулан мэргэжлийн хяналтын байцаагчид микрометр багаж хэрэглэхээр боллоо.

Нийлэг хальсан уут хэмжигч SHANGSHEN загварын микрометр багаж нь овор багатай, байцаагч нар өдөр тутам хэрэглэх боломжтой бөгөөд 0-25мм зузааныг 0.001 нарийвчлалтай хэмжих аж.

Мэргэжлийн хяналтын байгууллагаас Стандарт хэмжилзүйн газраар нийлэг хальсан уут хэмжигч 15 багажинд баталгаажилт хийлгэн, тохирлын гэрчилгээ гаргуулсан байна.

Засгийн газрын 189 дүгээр тогтоолын хүрээнд 0.035 мм ба түүнээс нимгэн гялгар уутыг худалдаа, үйлчилгээнд ашиглахыг хориглосон. Тогтоолын хэрэгжилтийг мэргэжлийн хяналтын байгууллага болон бусад холбогдох байгууллагууд ханган ажиллана.

Энэ дагуу байцаагч нарт сургалт хэлэлцүүлгийг МХЕГ, НМХГ, ХМХА хамтран зохион байгуулж, аймаг, нийслэл, төв орон нутаг болон дүүргүүд дэх МХХ-ийн хүнсний чанар стандарт, эрүүл ахуй халдвар хамгаалал,мал эмнэлэг, ургамал хорио цээр, байгаль орчны хяналтыг хэрэгжүүлдэг улсын байцаагчид хамрагдсан байна.

Сургалтын үеэр нийлэг хальсан уут хэмжигч микрометр багажаар худалдаа үйлчилгээнд нийлүүлэгдэж буй нийлэг уутнаас авсан загвар дээжид хийсэн хэмжилт, лабораторийн сорилтын дүнгийн талаар танилцуулга хийжээ.