НИТХ дахь АН-ын төлөөлөгчид хотын дарга болон ИТХ-ын даргыг сонгох сонгууль хууль бус болсон гэж мэдээллээ.

Энэ талаар НИТХ дахь АН-ын бүлгийн төлөөлөгч Л.Нарантуяа “Нийслэлийн Засаг дарга болон өчигдөр болсон ИТХ-ын даргыг сонгосон сонгуулийн байдлаас харахад өнөөдөр НИТХ бие даан шийдвэр гаргах боломжгүй болж. Уг нь НИТХ гэдэг Үндсэн хуулиар заагдсан институцийн байгууллага. НИТХ-ын 45 төлөөлөгч бол 45 тойргоос иргэдийн төлөөлөл болон сонгогдсон. Гэтэл өнөөдөр олонх болсон МАН-ын шийдвэрийг хүлээж авдаг, хамжлага байгууллага болчихсон байна. МАН-ынхан орж ирээд удирдах зөвлөлийнхөө шийдвэрийг ИТХ дээр уншаад батлуулах гэж тулгадаг болжээ. Олонх болсон 34 төлөөлөгчийг иргэдээ төлөөлөх, сонголт хийх эрхийг нь хааж, зөвхөн намын удирдах зөвлөлийн шийдвэр үйлчилж байна.

Өчигдөр ИТХ-ын даргыг сонгох сонгуулийн процессыг та бүхэн харсан байх. Нэр дэвших процесс хаагдаад саналын хуудсанд хоёр нэр хэвлэгдэж эхэлснээс хойш нэр татах асуудал байхгүй. Гэтэл өчигдөр нэг нэр дэвшигч нэрээ татчихсан. Уг нь АН-ын бүлгийн зүгээс хууль зөрчиж байна, дэгээ зөрчиж байгаа талаар удаа дараа сануулж, завсарлага авсан ч МАН-ынхан сонгуулиа хүчээр хийсэн. АН-ын намд хэн нь нэр дэвшээд даргаар сонгогдох нь хамаагүй ч гэсэн ИТХ-ын хурлыг хуулийн дагуу шийдвэр гаргадаг байгаасай гэсэн байр сууринаас хурлыг орхиж гарсан. НИТХ-ын даргыг сонгох процесс хууль зөрчсөн гэж үзэж байгаа учраас АН-ын бүлэг шүүхэд хандана” гэв.

Түүнчлэн НИТХ дахь АН-ын бүлэг өмнөх хотын дарга С.Батболдыг огцруулах асуудалд Ерөнхий сайдыг өөрийн биеэр ирж нийслэлийн иргэдийн өмнө яагаад албан тушаалаас нь чөлөөлөх болсон талаар тайлбар хэлэх, мөн эхний санал хураалтаар олонхийн санал авсан төлөөлөгч С.Мөнхчулууныг батламжилахаас татгалзсан үндэслэлээ хэлэхийг шаарджээ. Энэ талаар НИТХ дахь АН-ын бүлгийн дарга Ц.Баатархүү “Бид НИТХ-ын ажлыг хуулийн дагуу яваасай гэж хүсч байна. 45 төлөөлөгчийн саналыг тоолох гэж долоон цаг болж байна.

ИТХ-ын дарга болон Засаг даргын сонгуулийн саналыг ингэж хянаж байгаа бол ирэх онд болох Монгол төрийн сонгууль шударга, булхай луйваргүй явуулах үндэслэлгүй гэх хардлага төрүүлж байна. Сонгуулийг будлиантуулах магадлал өндөр байгааг сая болсон хотын дарга, ИТХ-ын даргыг сонгох сонгууль харууллаа” гэсэн юм.

Б.Лхам