Сургалтын цөм хөтөлбөрийг хэрэгжүүлэхэд тулгамдаж буй асуудлыг тодруулах, цаашид сайжруулах санал зөвлөмж боловсруулах зорилготой бага, суурь, бүрэн дунд боловсролын цөм хөтөлбөрийн Үндэсний хэлэлцүүлэг эхэллээ.

Бага боловсрол, монгол хэл, математик, нийгмийн ухаан, байгалийн ухаан, гоо зүй-технологи гэсэн зургаан чиглэлээр таван өдөр тусгай аргачлалын дагуу зохион байгуулах хэлэлцүүлэг нь хөтөлбөрийг гардан хэрэгжүүлэгч багш нар өөрсдөө дүн шинжилгээ хийхээрээ онцлог юм.

Хэлэлцүүлгийн хүрээнд сургалтын төлөвлөгөө, хөтөлбөрийн тохирц, агуулгын залгамж холбоо, өргөсөл, гүнзгийрэл, агуулгын давхардлыг судалж, сум, багийн ерөнхий боловсролын сургуулийн сургалтын зохион байгуулалт, багш, суралцагчийн ачааллыг бууруулах санал, зөвлөмж боловсруулж танилцуулах аж.

Уг санал зөвлөмжид үндэслэн Боловсрол, соёл, шинжлэх ухаан, спортын яам, Боловсролын хүрээлэн болон мэргэжлийн бусад байгууллагууд ерөнхий боловсролын сургуульд 2019-2020 оны хичээлийн жилд мөрдөх сургалтын төлөвлөгөө, сургалтын хөтөлбөрийг сайжруулан хөгжүүлж, үндэсний хэмжээний сургалтын бодлого болон шинээр батлагдан гарах дүрэм журамд тусган хэрэгжүүлэх юм.