Өнгөрөгч долоо хоногийн пүрэв гарагт Төв аймгийн Заамар сумын нутагт үйл ажиллагаа явуулдаг “Эко Алтан Заамар” ХХК-ийн уурхайд нуранги үүсч, дөрвөн иргэн дарагдсан ноцтой хэрэг гарсан. Уг хэргийг цагдаагийн байгууллагад шалгаж байгаа юм. Энэ талаар Мэргэжлийн хяналтын ерөнхий газрын дэд дарга Д.Энхсайхан "Эрүүгийн хэрэг үүссэн учраас хэргийн тухай дэлгэрэнгүй ярих боломжгүй. Аврах ажиллагаатай зэрэгцээд хяналт шалгалт давхар явагдаж байна. Ослыг бүртгэх, судлах комисс хэргийн газарт ажиллаж байна. Ослын шалтгаан нөхцөл тогтоогдсон хэдий ч хэрэг мөрдөн байцаалтын шатанд бидэнд мэдээлэл өгөх эрх байхгүй" гэсэн байна.

Осолд өртсөн иргэдийг эрэн хайх аврах ажиллагааг тав хоногийн турш явуулж, аврагчид 20 удаагийн шумбалт хийсний дүнд хоёр иргэний цогцсыг гаргаж авсан.

Бусад иргэдийн цогцсыг гаргаж авах ажиллагаа үргэлжилж байгаа бөгөөд ослын газарт Онцгой байдлын газрын дэд дарга, хурандаа Б.Ууганбаяр, Гамшгийн шуурхай удирдлагын газрын дарга, хурандаа С.Мандахгэрэл нараар ахлуулсан Үндэсний аврах бригад, Уул уурхайн аврах ангийн алба хаагчдаас бүрдсэн 100 гаруй хүн ажиллаж байна. Уурхайн удирдлагуудад эрүүгийн хэрэг үүсгэн мөрдөн байцаалт явуулж, ослын шалтгааныг тодорхойлсон байна.