Цэргийн албан хаагч хүнд даацын автомашинд дайруулж амь насаа алдсаныг бид мэдээллэсэн. Энэ асуудлаар Зэвсэгт хүчний жанжин штабын Хяналт шалгалт, үнэлгээний газрын шинжилгээ үнэлгээний ахлах мэргэжилтэн, дэд хурандаа С.Өлзийтогтох “Осол хоёрдугаар сар 28-ны өдөр болсон.

Талийгаач манай ангийн харьяа “Найман шарга” сувиллын газрын барилгын үйл ажиллагаа буюу цахилгааны шугам татах ажилд татахаар явсан. Тус өдөр тус ангийн сарын төлөвлөгөөт ажлын дагуу “Найман шарга” сувиллын газарт хайрга татах ажлаар томилогдсон хоёр ажилтан албан үүргээ гүйцэтгэж явахдаа осолд орсон. Нэг нь жолооч, нөгөөх нь ахлах ахлагч байсан.

Ахлах ахлагч ослын үеэр амь насаа алдсан. Хайрга татах үед автомашиныг энгийн жолооч жолоодож байсан. Ахлах ахлагч нь хажууд нь тусгай томилогдсон учраас туслах жолоочоор томилогдож ажилласан байна. Зуун мод орчмын хайрга дээр элсэрхэг, гулгамтгай газар руу өгссөн байна. Ингэж өгсөж явахдаа хүч алдаж, зогссон учраас машинаа хөдөлгөхийн тулд ахлах ахлагч бууж, машины дугуйнд юм хийж, туслахаар болсон байна. Энэ үед жолооч болон ахлагч ахлах хоёр буруу ойлголцсоны улмаас машин ухарч гулгаснаас осол гарсан” гэлээ.