Этиопийн иргэний агаарын тээврийн нислэгт ашиглагдаж байсан “Boeing 737 Max” загварын агаарын хөлөг осолдсонтой холбогдуулан “МИАТ” ТӨХК тус агаарын хөлгийн нислэгийг өнөөдрөөс эхлэн түр хугацаагаар зогсоосон билээ. Түүнчлэн дээрх агаарын хөлгийг үйлдвэрлэгч “Boeing” компаниас зөвлөмж гартал “Boeing 737 Max”-ыг нислэгт ашиглахгүй байх шийдвэр гарсан юм.

Монгол Улсын Засгийн газрын үйл ажиллагааны хөтөлбөрийн дагуу нислэгийн сүлжээгээ өргөжүүлэх, Азийн чиглэлд зах зээлээ тэлэх болон олон улсад нэр хүндтэй авиа компаниудтай эн тэнцүү өрсөлдөх бизнесийн чадвараа дээшлүүлэхэд дээрх агаарын хөлөг чухал үүрэг гүйцэтгэнэ хэмээн тооцоолж байсан. Энэ ч утгаараа шинэ загварын “Boeing 737 Max” хөлгийг МИАТ ТӨХК 12 жилийн түрээсийн гэрээгээр энэ оны хоёрдугаар сард худалдаж авсан юм.

Энэхүү агаарын хөлөг нь хамгийн сүүлийн үеийн технологиор тоноглогдсон, ижил төрлийн агаарын хөлгөөс түлшний зарцуулалт бага, найдвартай байдал, зорчигчдод илүү тав тухтай, байгаль орчинд ээлтэй байдлаараа давуу талтай. Мөн зорчигч өөрийн гар утас, таблетээрээ Wifi сүлжээ ашиглан агаарын хөлгийн үзвэрийн системтэй холбогдож, Hollywood-ийн кино, үзвэрээс сонгон үзэх боломжтойгоороо мэргэжилтнүүдээс өндөр үнэлгээ аваад байсан юм.

МИАТ компани нь “Boeing 737 Max” хөлгийг худалдаж авснаас хойш Берлин, Токио, Сөүл, Сингапур зэрэг дэлхийн өндөр хөгжилтэй орнуудад нислэг үйлдсэн аж. Гэвч агаарын тээврийн зах зээлд хамгийн их борлуулалттай, дундын зайн агаарын уг хөлөг Этиоп Улсад осолдсноос үүдэж, зорчигчдын аюулгүй байдлын үүднээс тус агаарын хөлгийг нислэгийг түр хугацаанд зогсоох шийдвэр гаргасан энэ юм.

Г.Алимаа