НИТХ өнөөдрийн хуралдаанаар орон нутгийн өмчит аж ахуйн тооцоот гурван аж ахуй нэгжийг менежментийн гэрээгээр ажиллуулах эсэхийг хэлэлцлээ.
Хуралдаанаар нийслэлийн Захирагчийн албанаас томилогдсон ажлын хэсэг тус гурван байгууллага дээр ажилласан дүгнэлтээ танилцуулах үеэр Булган аймгийн “Үртсэн шахмал түлшний үйлдвэр”, Багахангай дүүргийн “Багахангайн мах боловсруулах үйлдвэр, Налайх дүүргийн “Чандмань Налайх” ахуй үйлчилгээний төв гэсэн гурван байгууллагын үйл ажиллагаа зогсонги байдалтай байгааг танилцуулав.
ҮРТСЭН ШАХМАЛ ТҮЛШНИЙ ҮЙЛДВЭРИЙГ ШИНЭЧЛЭХЭД 952 САЯ ТӨГРӨГ ШААРДЛАГАТАЙ
Булган аймгийн “Үртсэн шахмал түлшний үйлдвэр” нь жилд 4000 тонн үртсэн шахмал түлш үйлдвэрлэх хүчин чадалтайгаар 2009 онд байгуулагдсан. Үйлдвэрт ашигладаг үр тэс нь шороотой байдаг учраас тоног төхөөрөмж элэгдсэн байна. Тиймээс Чех Улсаас шинэ тоног төхөөрөмж худалдаж авахад 600 сая төгрөг, түүхий эд болон урсгал засварт 352 сая төгрөг шаардлагатай гэжээ. 2014 онд нээлттэй дуудлага худалдаагаар худалдах гэсэн боловч санал ирээгүй байна.
БАГАХАНГАЙН МАХ БОЛОВСРУУЛАХ ҮЙЛДВЭР БАНКАНД 430 САЯ ТӨГРӨГИЙН ӨРТЭЙ
Багахангай дүүргийн “Багахангайн мах боловсруулах үйлдвэр” юм. 1994 онд байгуулагдсан тус үйлдвэр нь 2003 оноос хойш үйл ажиллагаа нь зогссон. Тоног төхөөрөмжийг сайжруулж, барилгад засвар хийх шаардлагатай. 2018 оны жилийн эцсийн тайлангаар 1.7 тэрбум төгрөгийн хөрөнгөтэй ч 470 сая төгрөгийн богино хугацааны зээлтэй гарсан байна. Өөрөөр хэлбэл, тэрбум төгрөгийн үнэтэй тоног төхөөрөмж, хоёр га газрыг 400 сая төгрөгийн өрөнд нь Улаанбаатар хотын банк хураан авсан байна. Түүнчлэн шүүхийн шийдвэрээр үйлдвэрээр битүүмжилсэн ч тус банкныхан үйлдвэрээс 4-5 контейнер зүйл ачаад явжээ. Хууль бус уг үйлдлийг нь Багахангай дүүргийн цагдаагийн хэлтэс шалгаж байгаа юм байна. Харин Нийслэлийн өмчийн харилцааны газраас Шүүхийн шийдвэр гүйцэтгэх ерөнхий газарт гомдол гаргаснаар зээлийн өрөнд хураасан үйлдлийг хүчингүй болгожээ.
ЖИЛ БҮР АЛДАГДАЛТАЙ АЖИЛЛАЖ ИРЖЭЭ
Налайх дүүргийн “Чандмань Налайх” ОНӨААТҮГ-ын ахуй үйлчилгээний төв нь өнгөрсөн жилүүдэд тогтмол алдагдалтай ажиллаж иржээ. Тус төв нь 2017 онд 44 сая төгрөгийн алдагдалтай ажилласан шалтгаан нь усаа цахилгаан халаагуураар халаадгаас болж цахилгааны зардал их гардаг байна. Дээрх гурван байгууллагыг 2018 оны ИТХ-ын XXI тогтоолоор өмч хувьчлалын жагсаалд орсон байна. Өнөөдрийн хуралдаанаар менежментийн хувьчлалын төсөл дээр хэлэлцүүлэг өрнүүлэх ёстой ч тэргүүлэгчдийн зүгээс менежментийн хувьчлалтай холбогдуулж нэмж тодруулах санал гарсан дараагийн хуралдаанаар үргэлжлэн хэлэлцэхээр боллоо.
Г.Нацаг
Сэтгэгдэл (4)