Энэ сарын 6-ны өдөр Эрдэнэт үйлдвэрт  онцгой байдал тогтоосон. Үүнтэй холбогдуулан Ерөнхийлөгчийн Тамгын газрын дарга З.Энхболд үргэлжлүүлэн хэд хэдэн орд газар дээр онцгой байдал зарлана гэдгийг мэдэгдсэн байдаг. Тодруулбал, Асгат, Цагаан суварга, Эрдэнэс Тавантолгой зэрэг ордуудад онцгой дэглэм тогтоож, 1997 оны хуулийг ашиглан авсан бүх лицензийг төрд буцааж авна гэсэн юм.

Тиймээс “Цагаан суварга”-ын ордтой холбогдуулан ямар нэгэн арга хэмжээ  авах эсэх талаар  АМГТГ-ын дарга Х.Хэрлэнгээс тодруулахад “УИХ-ын 2014 оны тогтоолоор “Цагаан суварга”-аас төр тэг хувь эзэмшихээр тогтоосон байдаг” гэв.

Түүнчлэн тэрбээр улсын төсвийн хөрөнгөөр хайгуул хийгдсэн ордуудын тусгай зөвшөөрөл авсан этгээдүүд хайгуулын зардлыг нөхөн төлөх гэрээ байгуулж ажилладаг. Тухайн зардлыг төлөөгүй тохиолдолд тусгай зөвшөөрлийг цуцлах хүртэлх арга хэмжээ авдаг юм. Өнөөдрийн байдлаар ийм зөрчил гараагүй. Улсын төсвийн хөрөнгөөр хайгуул хийгдсэн ордууд зардлаа төлөөд явж байгаа талаар хэллээ.

Өөрөөр хэлбэл, улсын төсвийн хөрөнгөөр хайгуул хийгдсэн “Цагаан суварга”-ын хайгуулын зардлыг төлсөн. Тухайн лицензийн зөвшөөрлийг цуцлах эрх зөвхөн компани хайгуулын зардлаа төлөөгүй нөхцөлд үүснэ гэдгийг АМГТГ-ын дарга тайлбарлав.

Б.Лхам