"Монголын бүтээлч ирээдүй-технологид суралцая" зорилтод хөтөлбөрийн хүрээнд уламжлал болгон зохион байгуулдаг "Миний анхны робот" бүтээлч арга хэмжээ боллоо.

Энэ удаагийн цувралаар замын түгжрэлийг сааруулах ач холбогдолтой, байгаль орчинд ээлтэй “Line Trace Robot” автобус угсрах онолын сургалт болон бүтээлч арга хэмжээг явуулав.

Түүнчлэн дөрөвдүгээр цуврал болох “Миний анхны робот-4” бүтээлч арга хэмжээнд оролцох хүүхдүүдэд зориулан хоёрдугаар сарын 20, 21-ний өдрүүдэд япон багш, Япон Улсад практикаар ашиглаж буй тусгай замаар явдаг, жолоочгүй автомат үйлдлийн системтэй “Line Trace Robot” автобусын талаарх онолын сургалтыг Үйлдвэрлэлийн инновацийн газарт явуулсан юм.

Сургалтад нийслэлийн 20 гаруй сургуулийн 30 гаруй сурагч хамрагдаж, роботоо угсаржээ. Тус сургалтад хамрагдсан хүүхдүүдэд уламжлал ёсоор угсарсан роботыг нь бэлэг болгон өгсөн аж.