Нээлттэй мэдээллийн санг үр дүнтэй ашиглаж, дата сэтгүүл зүйн чанартай бүтээл гаргадаг “Дата сэтгүүлзүйн 36 цагийн хакатон” өчигдөр Улаанбаатар инновацийн төвд эхэлсэн.

Эрэн сурвалжлах сурвалжлагчдын төлөө төв, ХБНГУ-ын Дойче Велле Академи хамтран Монголд анх удаа дата сэтгүүл зүйн хакатон зохион байгуулж байгаа бөгөөд Үндэсний статистикийн хороо дата мэдээллийн дэмжигч байгууллагаар оролцож байна. Тус тэмцээнд сэтгүүлч, дизайнер, хөгжүүлэгч, судлаач зэрэг төрөл бүрийн мэргэжил, туршлагатай 4-6 хүнээс бүрдсэн 12 баг 36 цагийн турш бүтээлээрээ өрсөлддөг юм. Монголын анхны дата сэтгүүл зүйн хакатоныг “Тэгш бус байдлыг тэгшитгэе” сэдвийн хүрээнд зохион байгуулж буй.

Өрсөлдөгч 12 баг нь нээлттэй мэдээллийн сан ашиглан тэгш бус байдалтай холбоотой асуудлаар дата сэтгүүл зүйн чанартай бүтээл гарна. Өөр өөр мэргэжил, туршлагатай багийн гишүүд хамтран ажиллаж, туршлага солилцохын зэрэгцээ дата болон сэтгүүл зүйн менторуудаас зөвлөгөө авах, суралцах боломжийг энэхүү үйл ажиллагаа бүрдүүлдэг. Ингэснээр дата сэтгүүл зүйн хакатоноос гарах бүтээлүүд нь чанартай, сонирхолтой байж, тэгш бус байдлын асуудалд олон нийтийн анхаарлыг татах мэргэжлийн, шинэ түвшний бүтээл болох юм.

Дата сэтгүүлзүйн 36 цагийн хакатоны ялагчийг өнөөдөр 18.00 цагт шалгаруулна.

Р.Хишигээ