АШУҮИС-ийн дэргэдэх Япон-Монголын Сургалтын эмнэлгийн барилгыг хүлээлгэж өгөх арга хэмжээ өнөөдөр боллоо.

Тус сургалтын эмнэлгийн ёслолын ажиллагаанд УИХ-ын гишүүн Б.Саранчимэг, Эрүүл мэндийн дэд сайд Л.Бямбасүрэн, Япон Улсаас Монгол Улсад суугаа Элчин сайд Масато Такаока, Боловсрол, соёл, шинжлэх ухаан, спортын дэд сайд Г.Ганбаяр, нийслэлийн Засаг дарга бөгөөд Улаанбаатар хотын Захирагч С.Амарсайхан болон албаны хүмүүс оролцлоо.

АШУҮИС-ийн тус эмнэлэг 104 ортой, дэвшилтэт технологи, өндөр түвшний эмнэлгийн тусламж үйлчилгээг үзүүлэх төдийгүй яаралтай тусламж үйлчилгээ, Монголд эмчлэгдэх боломжгүйд тооцогддог 26 өвчнийг эмчлэх  боломж бүрдэж байгаа юм. Үүнд, зүрх, судасны өвчин эмгэг, тархины өвчин эмгэг, хавдар зэрэг багтах аж.

Үүнээс гадна уг сургалтын эмнэлэгт сүүлийн үеийн дэвшилтэт техник технологи бүхий 360 гаруй тоног төхөөрөмж түүн дотроо 1.5 тесла хүчин чадалтай MRI, CT, ангиограф (бүхий л судасны зураг авдаг) зэрэг Монголд байхгүй оношилгооны аппаратууд дагалдаж байгаа юм. “Өвчтөн төвтэй эмнэлгийн тусламж үйлчилгээ” нь өвчтөнд ойр, өвчтөнд таатай байх тусламж үйлчилгээг үзүүлж, өвчтөнд дэмжлэг үзүүлэх төвийг байгуулж, эмнэлэгт хэвтэх, эмнэлгээс гарахад өвчтөн болон тэдний ар гэрт учрах ачааллыг бууруулах үйлчилгээ аж.

Тус эмнэлгийн барилгыг Баянзүрх дүүргийн XII хороо буюу Ботаникийн цэцэрлэг хүрээлэнгийн хажууд байрладаг юм.

Р.Хишигжаргал