Нийслэлийн мэргэжлийн хяналтын газрын 11 улсын байцаагч Налайх дүүрэг дэх нүүрс олборлох тусгай зөвшөөрөл эзэмшигч 21 аж ахуйн нэгжид хяналт шалгалт хийсэн талаараа өнөөдөр мэдэгдлээ.
Шалгалтаар нүүрс олборлох тусгай зөвшөөрөлтэй “Сүмбэрхудаг”, “Таван Шүтээн”, “Хэлтрэгэ” компаниуд өөрсдийн эзэмшдэг талбайдаа есөн нөхөрлөлийн 590 иргэнийг хууль бусаар ажиллуулж байсан нь илэрсэн байна.
Тодруулбал, “Сүмбэрхудаг” компани хөдөлмөрийн аюулгүй байдлыг хангахгүйгээр иргэдийг өөрсдийн эзэмшлийн талбайдаа оруулж олборлолт явуулснаас болж 2018 онд гурав, 2017 онд таван хүний амь нас эрсджээ.
Тус компани нь Налайх дүүрэг дэх нүүрсний 83 цооногийн 70-ыг нь дангаараа эзэмшдэг байна. Цооногт нүүрс олборлох гурвалсан гэрээ байгуулахдаа иргэдээс “Олборлолт хийсэн шимтгэл авна. Гэхдээ эрүүл мэнд, амь насаараа хохирвол компани ямар ч хариуцлага хүлээхгүй” гэдэг заалтыг гэрээндээ оруулсан нь ноцтой зөрчил гэдгийг улсын байцаагчид хэлсэн юм. Тиймээс найман иргэдийн амь насанд хүрсэн, цаашид ч иргэдийн аминд хүрч мэдэх “Сүмбэрхудаг” компанийн үйл ажиллагааг зогсооно гэдгээ Нийслэлийн мэргэжлийн хяналтын газраас мэдэгдлээ.
Налайх дүүрэгт нүүрс олборлох тусгай зөвшөөрөл эзэмшигчдийн 12 нь тусгай зөвшөөрөл эзэмшсэнээсээ хойш гурван жилийн хугацаанд ямар нэгэн олборлолт хийгээгүй. Харин нүүрс олборлох үйл ажиллагаа явуулж буй есөн аж ахуйн нэгж нь уурхай дээрх эрхзүйн бичиг баримтгүй, байгаль орчин нөлөөлөх байдлын нарийвчилсан үнэлгээгүйгээр үйл ажиллагаа явуулж байсан зөрчил мөн илэрчээ.
Г.Нацаг
