Бяцхан сод авъяастан Б.Бат-Энэрэл хүүгийн "Сэтгэлэн Залбирлан" анхны бие даасан тоглолт энэ сарын 14-нд Улаанбаатар паласт болох гэж байна.

Тэрбээр тоглолтынхоо бүх орлогыг хүнд ѳвчний улмаас шаналж буй Э.Маргад-Эрдэнэ хүүгийн эмчилгээний зардалд хандивлах аж. Э.Маргад-Эрдэнэ хүүг бөөрний хорт хавдартай гэсэн хариуг Бона Вита лаборатороос гаргаснаас болж, химийн эмчилгээ, хагалгаа хийсэн юм. Үүний дараагаас хүүгийн биеийн байдал хүндэрч гурван сарын дараа мэдрэлийн эсийн хорт хавдар гэсэн онош тодорсон байдаг. Энэ өвчнийг зөвхөн гадаадад эмчилдэг бөгөөд Солонгос Улсад харьцангуй хямдаар буюу 400 сая воноор эмчлэх боломжтой гэсэн хариуг хүлээн авчээ.

Хүүгийн эмчилгээний зардлын 30 хувь нь бүрдэж, аав, ээжийн хамт БНСУ-ыг зорьсон юм. Солонгост ажиллаж, амьдардаг монголчууд хүүг тосон авч, “Самсунг Сөүл” эмнэлэгт хүргэж өгчээ. Б.Бат-Энэрэл хүүгийн "Сэтгэлэн Залбирлан" тоглолтын билет 20 мянган төгрөгийн үнэтэй бөгөөд билетийг таны хүссэн газарт үнэ төлбөргүй хүргэж өгнө гэдгийг зохион байгуулагчид хэлж байна.