Нийслэлийн Газрын алба, Улаанбаатар хотын Захирагчийн газрын албанаас зөвшөөрөлгүй хашаа, сурталчилгааны самбарыг буулгах талаар мэдээлэл өнөөдөр хийлээ.

Уг ажилтай холбогдуулан нийслэлийн Засаг даргын захирамж гарчээ. Тухайлбал, орчны аюулгүй байдлыг хангах зорилгоор хашаа, хайс буулгах ажлыг зохион байгуулах, Газрын зөрчил арилгах тухай захирамж гарсан байна.  

Газрын зөрчил арилгах ажлын хүрээнд явган хүний зам, талбайг чөлөөлх ажлыг үргэлжлүүлэхээр болжээ. Эхний ээлжинд иргэдээс болон холбогдох байгууллагаас ирсэн саналуудыг үндэслэн 25 байршлыг чөлөөлжээ.

Энэ талаар Нийслэлийн Газрын албаны дарга Э.Болорчулуун “Уг байршилд явган хүн зорчих боломжгүй шон, хашаа зоосон байсан. Мөн нийслэлийн Газрын албанаас сайтаараа дамжуулан иргэдээс санал хүлээн авч байгаа бөгөөд одоогийн байдлаар нийт 45 санал хүлээн аваад байна. Газрын зөрчил арилгах ажлын хүрээнд авто замын гарц, явган хүний зам  чөлөөлөх, зөвшөөрөлгүй баригдсан хайс, хашааг буулгах, эзэмшил газраасаа илүү гаргаж хашаа барьсан зэрэг зөрчлийг арилгана” гэв. Ингээд түүнээс зарим зүйлийг тодрууллаа.

-25 байршлыг чөлөөлсөн гэж байна. Зардлыг нь яаж шийдэж байгаа вэ. Буруутай этгээдүүдээр гаргуулж байгаа юу?

-Энэ байршлын ихэнх нь явган хүн зорчих боломжгүй шон зоосон байсан. Зарим байршлуудад эзэн нь тодорхой бус байсан тул нийслэлийн Газрын албанаас албадан чөлөөлөх ажил хийгдэж байна. Харин эзэнтэй тохиолдолд шүүхэд нэхэмжлэл гаргаж, буруутай этгээдээс зардлаа нөхөн гаргуулж ажиллаж байна.

-Зөвшөөрөлгүй хашаа, хайс барьдаг тохиолдол ямар байгаа вэ?

-НИТХ-аас хашаа, хайсны талаар тогтоолын журам гарсан. Энд ямар хашаа хаалт барих зэрэг бүх стандарт заагдсан байгаа тул гаргасан захирамжийн хүрээнд зөвшөөрөлгүй хашаа барьсан газруудыг цэгцлэхээр ажиллаж байна. Сүүлийн хоёр жилд зөвшөөрөлгүй хашаа хатгах явдал буурсан үзүүлэлттэй гарсан.

-Зөвшөөрөлгүй өргөтгөл барих асуудал гардаг. Сүүлийн жилүүдэд энэ асуудал гарав уу?

-Сүүлийн хоёр жилд зөвшөөрөлгүй өртгөтгөл барих асуудал гараагүй.

-Багшийн хөгжлийн ордны баруун талд байдаг хашааг судалгаандаа тусгасан байгаа юу?

-Энэ бол дахин төлөвлөлтөд багтсан газар шүү дээ.

Мөн төлбөр хураамжаа төлдөггүй, хориглосон газар реклам зар сурталчилгаа  байрлуулсан самбарыг буулгаж байна. Уг ажлыг цаашид ч  үргэлжлүүлнэ гэдгийг Улаабаатар хотын менежер Т.Гантөмөр хэлж байна. Тэрбээр “Байгууллага, аж ахуйн нэгжүүдийн хаягийн байгууламжийг Засгийн газрын тогтоолын дагуу ямар фон, хэлбэр, загвартай байхыг журмаар тогтооно. Хайс, хашлага, рекламын зар сурталчилгааны талаар үе үеийн Засаг дарга нараас шийдвэр гарч холбогдох байгууллагаас ажиллаж байгаа боловч энэ ажил сайн явж өгөхгүй байна. Мөн холбогдох байгууллагынх нь зөвшөөрлийг авчихаад хашаан дотроо журам зөрчсөн, янз бүрийн хэлбэртэй самбарыг сүүлийн үед их хэмжээгээр гаргаж байна. Харин иргэн өөрийн эзэмшил газар зөвшөөрөлгүй самбар босгосон асуудлыг албадан буулгая гэхээр тийм хуулийн зохицуулалт байдаггүйгээс арга хэмжээ авч чадахгүй, ажил удааширч байна” гэв.

Б.Лхам