“Ил мэдээллийн далд уялдаа” дата сэтгүүл зүйн анхны цугларалт өчигдөр боллоо. Энэ үеэр дата сэтгүүл зүйн шилдэг бүтээлийг шалгаруулав. Шалгаруулалтад оролцсон багуудаас МҮОНР, Livetv.mn, Эрэн сурвалжлах сурвалжлагчдын төлөө төвийн сэтгүүлчдийн “Brain Storm” баг “Тэтгэврийн даатгалын сүүдэр” дата бүтээлээрээ тэргүүн байр, “Өнөөдөр” сонин, Onlinetv.mn сайтын сэтгүүлчдийн “Today” баг “Дэмжих зорилготой ч дэмждэггүй сан” бүтээлээрээ дэд байрын шагнал хүртлээ.

Дата сэтгүүл зүйн бүтээл хийх, шилдэг бүтээлийг шалгаруулах энэхүү үйл ажиллагаа нь Хэвлэлийн Хүрээлэнгээс Германы Дойче Велле Академийн дэмжлэгтэйгээр энэ оны нэгдүгээр сараас эхлэн хэрэгжүүлсэн “Open Data” төслийн хүрээнд хийгдсэн томоохон ажил байлаа.

Дата сэтгүүл зүйг хөгжүүлэх, нээлттэй өгөгдлийн хэрэглээг нэмэгдүүлэх ажлаа дүгнэсэн энэхүү цугларалтад DW академийн Монгол дахь хөтөлбөр хариуцсан менежер Патрик Бенинг, ЗГХЭГ-ын Мэдээллийн технологийн хэлтсийн дарга Ж.Тамир, Үндэсний Статистикийн хорооны дарга А.Ариунзаяа, Хэвлэлийн Хүрээлэнгийн гүйцэтгэх захирал М.Мөнхмандах, "Open Data" төслдийн зөвлөх Роберт Ритц, их дээд сургуулийн сэтгүүл зүйн багш, нээлттэй өгөгдлийг дэмжигч сэтгүүлч, судлаач, мэргэжилтнүүд зэрэг тал бүрийн хүмүүс оролцсон юм..

Мөн төслийн хүрээнд нээлттэй өгөгдлийн бүрдлүүд бүхий Opendata.mn портал сайтыг танилцуулав. Нээлттэй өгөгдлийн хэрэглээг нэмэгдүүлэх зорилготой өгөгдлийг цогц сан болгохоор энэхүү портал сайтад одоогоор 200 гаруй иж бүрэн өгөгдөл хуулжээ. Цаашид уг портал сайтыг улам өргөжүүлэхээр ажиллаж байна.