Ахмад настан, хөгжлийн бэрхшээлтэй иргэдийг нийтийн тээврийн хэрэгслээр үнэ төлбөргүй зорчихыг зогсоогоогүй гэдгийг НИТХ-аас мэдээллээ.

Тодруулбал, өчигдөр нийслэлийн ИТХ-ын ээлжит XXIV хуралдаан болж, зарим журмыг хүчингүй болгох тухай асуудлыг хэлэлцэн шийдвэр гаргасан. Уг шийдвэрээр  “Нийслэлийн нутаг дэвсгэрт садар самуун үйлдлийг хориглох тухай” 02 дугаар тогтоол, 2013 онд нийслэлийн ИТХ-ын 3/31 дүгээр тогтоолоор баталсан “Гэр хорооллын дахин төлөвлөлтийн үйл ажиллагааны журам”, ИТХ-аас 2015 онд баталсан ахмад настны нийтийн тээврийн хэрэгслээр үнэ төлбөргүй зорчих тогтоол, 23/02 дугаартай “Газар шинэчлэн зохион байгуулах үйл ажиллагааны журмыг батлах” тогтоол зэрэг тогтоолыг хүчингүй болгосон талаар мэдээлж байсан юм.

Гэвч өнөөдөр НИТХ-аас тайлбар гаргаж ахмад настан, хөгжлийн бэрхшээлтэй иргэдийг нийтийн тээврийн хэрэгслээр үнэ, төлбөргүй зорчуулах үйл явцыг зогсоогоогүй бөгөөд дээрх журмуудын үндэслэл болгосон хууль нь хүчингүй болсон тул тухайн харилцааг өөр эрх зүйн хэм хэмжээний актаар зохицуулж буй байгаа гэв.

Эх сурвалж: НИТХ