ЗГХЭГ-ын дарга Л.Оюун-Эрдэнэ Сүхбаатарын талбайн нэгээхэн хэсгийг хувийн компанийн эзэмшилд очсныг хэдэн сарын өмнө мэдэгдэж байв. Гэвч  “Эрдэнэт” үйлдвэрийн 49 хувьтай холбоотой дуулианы чимээнд дарагдаж, иргэд нэг их анхаараагүй. Харин хэд хоногийн өмнө “Улсаа аврах ард түмний хөдөлгөөн”-өөс тус талбайн гуравны нэг хэсгийг банкны барьцаанд тавьж зээл авсан талаар мэдэгдэж хотын даргад шаардлага хүргүүлснээр олны анхааралд дахин өртсөн юм.

Эл үйл явдлаас хэд хоногийн дараа буюу энэ сарын 23-ны өдөр Нийслэлийн Засаг дарга бөгөөд Улаанбаатар хотын захирагч С.Амарсайхан А/364 тоот захирамж гаргаж,  газар олгосон дээрх захирамжийг хүчингүй болгосон байдаг. Мөн одоо авто зогсоол байгаа хэсэгт нийслэл өөрийн хөрөнгө оруулалтаар усан оргилуур бүхий бүтээн байгуулалт, нийтийн бие засах газар зэргийг барихаар төлөвлөснөө дуулгасан.

Хотын даргын дээрх захирамжийн хүрээнд Сүхбаатарын талбай дахь авто зогсоолыг албадан буулгах үйл ажиллагаа өнөөдөр боллоо. Тухайлбал, нийслэлийн Газрын алба, нийслэлийн Захирагчийн газрын алба болон нийслэлийн Мэргэжлийн хяналтын газраас талбайн зогсоолыг лацадсан бөгөөд маргааш албадан буулгах ажиллагааг үргэлжлүүлнэ гэв. 

Учир нь Сүхбаатарын талбайд авто зогсоолын үйл ажиллагаа эрхлэх зөвшөөрөл авсан “Ub constraction” компани гэрээгээр хүлээсэн үүргээ биелүүлээгүй байна. Тодруулбал, УИХ-ын гишүүн асан Ц.Батбаярыг хотын даргаар ажиллаж байх үе буюу 2006 онд төв талайн урд хэсэг болон цэцэрлэгт хүрээлэнгийн 2.5 га газар дээр усан оргилуур бүхий үйлчилгээний төв байгуулах төсөл шалгарч, “Ub constraction” компанид 15 жилийн хугацаатай эзэмшүүлж байжээ. Энэ хугацаанд бүтээн байгуулалт огт хийгдээгүй байдаг. Гэтэл нийслэлээс тус компанитай гэрээ байгуулж, төр өөрийн хөрөнгөөр авто зогсоол байгуулсан байна. Ингэхдээ авто зогсоолын үйл ажиллагааны орлогын 30 хувийг нийслэлд төвлөрүүлж байхаар гэрээ байгуулсан ч өнөөг хүртэл нэг ч төгрөг төвлөрүүлээгүй байх юм.  Энэ талаар нийслэлийн Газрын албаны дарга Х.Болорчулуун “Манай байгууллагаас “Ub constraction” компанид гурав хоногийн дотор талбайг чөлөөлөх шаардлага хүргүүлсэн. Гэвч шаардлагыг хүлээн зөвшөөрөөгүй тул өнөөдөр үйл ажиллагааг нь зогсоож байна” гэв.

Мөн “Ub constraction” компанийн хөндөгдөж байгаа нэг асуудал нь авто зогсоол ашиглаж байсан тус талбайг 9.5 сая ам доллараар барьцаанд тавьсан явдал юм. Уг асуудлаар хуулийн байгууллагад хандсан талаар нийслэлийн Захирагчийн албаны орлогч дарга Мөнгөншагай хэлсэн бөгөөд тэрбээр “Өнгөрсөн хоёр жилд тус компани тодорхой хэмжээний ашиг олсон нь гарцаагүй. Гэтэл ямар ч ашиг олоогүй л гэж ярьсан. Ашиггүй ажиллана гэж байхгүй. Тухайн ашгийнх нь тодорхой хувь Авто замын санд орох ёстой. Энэ үүргээ биелүүлээгүй тул хуулийн байгууллагад хандсан. Мөн нийслэлийн төсөвт оногдох хувиа нэхэмжилж, “Ub constraction”-аас гаргуулна” гэсэн юм.

Түүнчлэн хотын даргын  эл гаргасан шийдвэр шүүх дээр очоод буцаагдах магадлал өндөр байгаа гэдгийг мөн учирлав. Учир нь нийслэлийн Засаг дарга асан Э.Бат-Үүл даргын үед уг гэрээг хүчингүй болгохоор нийслэлээс шийдвэрлэсэн ч шүүхээс буцаагдаж байжээ.