Баян-Өлгий аймагт энэ сарын 29-30-ны өдрүүдэд гэр бүлийн хоёр хүн дараалан нас барсан хэрэг гарсан байна. Нас барсан иргэд адууны мах идсэн гэх өгүүлэмжтэйгээр аймгийн нэгдсэн эмнэлэгт эмчлүүлж байгаад нас барсан аж. 

Эх сурвалжийн мэдээллэснээр эдгээр иргэд эмнэлэгт хандахаасаа гурав хоногийн өмнө тарваганы мах идсэн гэх бөгөөд тарваган тахал өвчнөөр амиа алдсан байж болзошгүй юм байна. 

Дээрх үйл явдалтай холбоотойгоор Баян-Өлгий аймгийн онцгой комисс яаралтай хуралдаж, хорио цээрийн дэглэм тогтоон, гурав хоног архи согтууруулах ундааны зүйл худалдахыг хоригложээ.

Өвчилсөн болон нас барсан иргэнээс авсан шинжилгээний хариу гараагүй тул тухайн иргэдийн амьдарч байсан гэр орон, эмчлүүлж байгаа аймгийн Нэгдсэн эмнэлэг, зорчиж явсан Цагааннуур-Улаанбайшинт чиглэлд урьдчилан сэргийлэх зорилгоор Эрүүл мэндийн сайдын 2017 оны А/160 дугаар тушаалын 1 дүгээр хавсралтын 12.2.1 дэх заалтыг үндэслэн аймгийн Онцгой комиссын шийдвэрээр тодорхойгүй хугацаагаар хорио цээрийн дэглэм тогтоолоо. Энэ хүрээнд олон нийтийг хамарсан арга хэмжээ зохион байгуулах, архи согтууруулах ундаа худалдах, түүгээр үйлчлэхгүй байхаар хориглосон шийдвэр мөн гаргасан байна. 

Шинжилгээний эцсийн хариу сэжигтэй тохиолдол илэрснээс хойш 72 цагийн дотор гарах учир ард иргэд сонор сэрэмжтэй байж, хорио цээрийн дэглэм тогтоосон чиглэлд зорчихгүй байхыг зөвлөсөн байна.

Хорио цээрийн дэглэм тогтоосонтой холбогдуулан мэргэжил, арга зүйн удирдлагаар хангах, цаг үеийн нөхцөл байдлын талаар мэдээлэх ШУУРХАЙ ШТАБ байгуулан ажиллуулж байгаа бөгөөд 70427049, 98425101 дугаартай утсаар холбогдон мэдээлэл авах боломжтой аж.

Г.Нацаг