Нийтийн тээврийн газраас нийтийн тээврийн чиглэлд өөрчлөлт орсон талаар мэдээлэл хийлээ.

Тодруулбал, Ч:7 буюу Зунжин-7 буудал-Нисэх чиглэлийг Ч:69, Ч7 гэж хоёр чиглэлд хуваажээ. Иргэд тухайн чиглэлэийн автобусыг 15-20 минут хүлээдэг байсан бол өөрчлөлт орсноор 7-8 минут болж багасчээ. Мөн Баянхошуу-Нарны гүүр-ТЭЦ чиглэлд өөрчлөлт оруулжээ.

Энэ талаар Нийслэлийн нийтийн тээврийн газрын Тээврийн хэлтсийн дарга Х.Булгаа “Дээрх чиглэлүүдэд өөрчлөлт орсонтой холбогдуулан ирэх даваа гарагаас эхлэн “ЭКСПРЕСС” чиглэлийн автобусыг үйлчилгээнд нэвтрүүлж байна. Тухайлбал, ЭКСПРЕСС-1 чиглэлийн автобус 5 шар-Зүүн 4 зам буюу Энхтайвны өргөн чөлөө рүү явна. Энэ чиглэл үйлчилгээнд гарч байгаа бусад автобуснуудаас юугаараа ялгаатай гэхээр зөвхөн тогтоосон цөөн хэдэн чиглэлүүдэд зогсохоороо онцлог юм. Ингэснээр иргэд 5 шараас Зүүн 4 зам хүртэл 15 минутын хугацаанд зорчих боломж нээгдэж байна гэсэн үг. Уг чиглэлийн зогсоол нь 5 шар, Саппоро, Хархорин, X хороолол, 25 дугаар эмийн сан, Баруун 4 зам, Улсын Их дэлгүүр, Сүхбаатарын талбай, Өргөө амаржих газар, Зүүн 4 зам гэсэн зогсоолуудад зогсоно.  

Харин ЭКСПРЕСС-2 чиглэлийн автобус 5 шар-Саппоро-Бөмбөгөр-МУИС-Хөгжим бүжиг чиглэлээр явна. Энэ нь 5 шар, 32-ын тойрог, Саппоро, X хороолол, 25 дугаар эмийн сан, ELFA төв, Бөмбөгөр худалдааны төв, МУИС, Хөгжим бүжиг гэсэн зогсоолуудад зогсох бөгөөд уг чиглэлд зорчигчид 10 минут хурдан явах боломжтой болсон.

ЭКСПРЕСС-3 чиглэлийн автобус Зунжин-7 буудал, Ард кино театр-120 мянагт-ТЭЦ3 чиглэлд явна. Уг чиглэл нь 7 буудал, 17 дугаар сургууль, 32-ын тойрог, Хүнсний IV, I дэлгүүр, Ард кино театр, Баянгол зочид буудал, 120 мянагт, Ажилчдын соёлын ордон, ТЭЦ3 гэсэн зогсоолуудад зогсоно. Энэ нь Ч:69 чиглэлийн автобустай маршрут нэг боловч зогсоолуудын хувьд ялгаатай” гэв.

Мөн ирэх даваа гарагаас хэд хэдэн чиглэл нээж байгаа юм байна. Тухайлбал, Ч:71 чиглэлийг нээжээ. Энэ чиглэл нь Дүнжингарав-Баянмонгол-Хүннү хороолол-Төв цэнгэлдэх гэсэн чиглэлээр явна. 

Б.Лхам