Олон улсын хөдөлмөрийн байгууллагын 100, Монгол Улсад хөдөлмөрийн асуудал хариуцсан төрийн захиргааны төв байгууллага бие даан байгуулагдсаны 60 жилийн ойг тохиолдуулан “Хөдөлмөр, нийгмийн хамгааллын салбарын үндэсний зөвлөгөөн”-ийг өнөөдөр зохион байгуулж байна.
Зөвлөгөөнд уг салбарт ажиллаж байсан үе үеийн төлөөлөл, хамтрагч түнш, олон улсын байгууллагын нийт 800 гаруй төлөөлөгч оролцож байна.
Арга хэмжээг нээж ерөнхийлөгч Х.Баттулга “Тун удахгүй гадаадад ажилладаг монгол иргэдийн тоо 200 мянгад хүрэх гэж байна. Энэ тоог яаж бууруулах вэ. Гадаадад ажиллахаар явж буй иргэдийн дийлэнх нь эрүүл саруул, хийж бүтээх, хөдөлмөрлөх насан дээрээ явдаг. Учир нь эх орондоо ажиллая гэхээр цалин хангамж нь хүрэлцдэггүй. Улмаар үүнээс үүдсэн гэр бүл салалт ч их нэмэгдэж байна. Тиймээс монголын төр иргэдийн цалин хүрэлцээг хангалттай хэмжээнд хүргэхэд анхаарч ажиллааасай гэж хүсч байна. Хамгийн гол нь шийдвэр гаргах түвшинд ажиллаж байгаа албан тушаалтнууд зүрх сэтгэлээсээ ажиллах хэрэгтэй байна.
Өнөөдөр их, дээд сургуулийн тоо 100-д хүрлээ. Нийт төгсөгчдийн 60 орчим хувь нь ажилгүй байна. Тиймээс хөдөлмөр эрхэлдэг мэргэжил сургалтын төвийг сайн дэмжих хэрэгтэй. Ажилчин ангийг бэлдмээр байна. Бид 200 мянган хүнийг л ажлын байраар тогтвортой хангачихвал Монгол Улс хөгжинө” гэдгийг онцолж байлаа.
Мөн Ерөнхий сайдыг төлөөлөн туслах Н.Хүрэлбаатар “Монгол Улсын Засгийн газар 6.5 их наяд төлбөрийг төлж барагдууллаа. Алдагдалд ороод байсан төсвийг 2018 онд анх удаа 12 тэрбум төгрөгийн ашигтай гаргасан. Мөн хүнсний буудай, төмсний хэрэгцээг дотооддоо хангадаг боллоо. Түүнчлэн 2017, 2018 он Монгол Улсын хувьд их бүтээн байгуулалтын жил байлаа. Тухайлбал, цахилгаан эрчим хүчний хэрэглээ 8.6 тэрбум кв.т цаг болж 15 хувиар нэмэгдэж, 22 мянган хүн ажлын байраар хангагдлаа. Энэ нь манай засгийн газраас хийж буй томоохон төсөл хөтөлөрүүдтэй холбоотой юм. Мөн Засгийн газраас тэтгэвэл тэтгэмж нэмэгдүүлэх, цалинтай ээж, насны хишиг зэрэг арга хэмжээг авч хэрэгжүүлж байна. Сүүлийн жилүүдэд нэмэгдээгүй байсан төрийн албан хаагчдын цалинг нэмэгдүүлж ажиллалаа.
Гэвч манай улсад дээд боловсролтой ажилгүйчдийн тоо жил ирэх тусам нэмэгдсээр байна. Энэ нь тоонд биш чанарт тулгуурлах шаардлагатайг харуулж байна. Тиймээс Мэргэжлийн сургалт үйлдвэрлэлийг төвийг тэлж, суралцагсдад олгох мөнгөн тэтгэмжийн хэмжээг нэмэгдүүлэх шаардлагатай байна” гэв.
Б.Лхам
