Нийслэлийн Засаг даргын зөвлөлийн өнөөдрийн ээлжит хуралдаанаар нийслэлийн нутаг дэвсгэрт мал аж ахуй эрхлэхийг хориглосон бүсээс мал бүхий иргэд, гахай, шувууны аж ахуйг хөдөө орон нутагт нүүлгэн шилжүүлэх ажлын явцын талаар танилцуулав.
“Нийслэлийн Газрын албанаас мал аж ахуй эрхлэхийг хориглосон бүсийн иргэдээс санал асуулга явуулахад Сонгинохайрхан дүүргийн 21 дүгээр хороо, 335 дугаар гарам, Нарийны хэсэг, Баянзүрх дүүргийн 20 дугаар хороо, Арцатын аманд мал аж ахуй эрхлэх хүсэлт гаргасныг харгалзан үзэж, таван дүүргийн мал бүхий 468 өрхийг дээрх газруудад нүүлгэн шилжүүлэх ажлыг зохион байгуулжээ. Мөн Сонгинохайрхан дүүргийн хоёр байршилд 325 өрх, Баянзүрх дүүргийн Арцатын аманд 153 өрх айлыг цахилгаанаар хангаж улсын комисст хүлээлгэж өгсөн.
НИТХ-ын энэ оны 21/06 дугаар тогтоолоор нийслэлийн мал аж ахуй эрхлэхийг хориглох бүсийг шинэчлэн тогтоож Баянзүрх дүүргийн 11 дүгээр хорооны Шалган нэвтрүүлэх товчоо, Ногоон зоорь, Туул зөрлөг, Ургах наран хороолол, Сонгинохайрхан дүүргийн 32 дугаар хорооны Мал бордох, Баруунтуруун 384 дугаар гармын хэсэг, Хан-Уул дүүргийн 12 дугаар хорооны Малчин, Өлийн ам, Таван толгой, Цоохор, Цагаан эргээс бусад хэсгийг нэмж хамруулсан” гэв. Мөн Чингэлтэй, Сүхбаатар, Баянзүрх, Хан-Уул, Сонгинохайрхан дүүргийн хориглосон бүсэд мал аж ахуй эрхэлж байгаа 600 гаруй өрхийн иргэдтэй уулзалт зохион байгуулж, санал солилцжээ.
Одоогийн байдлаар мал аж ахуй эрхлэхийг хориглох бүсээс хөдөө орон нутаг руу нүүх 1067 толгой мал бүхий 54 өрхийн судалгааг гаргаж, орон нутгийн Мал эмнэлгийн тасагтай хамтран хөдөө орон нутаг руу саадгүй нэвтрүүлэх ажлыг зохион байгуулж байна.
Сэтгэгдэл (1)