“СҮҮ” хувьцаат компанийн “Амтлаг” тарагнаас хулгана гарсан” мэдээлэл өнгөрсөн сарын 26-ны өдрөөс эхлэн асуудал дагуулж эхэлсэн билээ. Тодруулбал, тус өдөр иргэн Б “Баянзүрхийн товчооны ойролцоох “Сансар” худалдааны төвөөс тараг худалдан авч, иарагны ихэнхийг хүүхдэд өгч дуусах үед гялгар уутнаас сарвуу цухуйсан. Гайхаж цочирдоод шалгатал үхсэн хулгана байсан” хэмээн хэвлэлд өгсөн ярилцлагадаа дурдсан байдаг.
Тухайн үед уг асуудлаар “СҮҮ” ХК-ийн зүгээс “Сошиал суваг болон олон нийтийн хэвлэл мэдээллийн хэрэгслүүдээр "Сүү" ХК-ийн бүтээгдэхүүнтэй холбоотой хэрэглэгчдийг төөрөгдүүлсэн, ор үндэсгүй мэдээлэл цацагдаж, компанийн болон брэндийн нэр хүндэд халдаж байгаад харамсаж байна. Энэ асуудлаар бид мэргэжлийн болон хууль, хяналтын байгууллагуудад хандаж шалгуулах болно” хэмээн мэдэгдэж байв.
Ийнхүү дээрх асуудлаас үүдэн хэрэглэгчдийн дунд ““СҮҮ” ХК-ийн тараг хулганатай” эсвэл “чанарын шаардлага хангахгүй тараг түгээдэг байсан байна”, “битгий хэрэглэ” зэрэг сөрөг хандлага цахим сүлжээгээр их хөвөрсөн.
Уг асуудалтай холбогдуулан Сонгинохайрхан дүүрэг дэх Мэргэжлийн хяналтын газрын лаборатори хулгана гарсан тарагнаас дээж авч шинжилжээ. Эх сурвалжийн мэдээлж буйгаар хулгана үйлдвэрийн орчинд уутанд орсон бус гэрийн нөхцөлд орсон болох нь шинжилгээгээр тогтоогдсон байна. Уг дүгнэлтийн талаар Сонгинохайрхан дүүрэг дэх Мэргэжлийн хяналтын газраас тодруулах гэсэн боловч “Шинжилгээний дүгнэлтийг прокурор руу шилжүүлсэн. Прокуророос хариу өгөх хүртэл ямар нэгэн мэдээлэл өгөх боломжгүй” гэсэн юм.
Энэ талаар бид эргэн мэдээлэх болно.
Б.Лхам
Сэтгэгдэл (9)