Баянгол дүүрэг БНСУ-ын Сүнчон-Хянг их сургуультай хамтран “Залуусаа дэмжицгээе” өдөрлөг зохион байгууллаа. Тус өдөрлөг нь  гадаадад сурах, мэргэжил эзэмших хүсэлтэй ерөнхий боловсролын сурагчдыг тус сургуульд үнэ төлбөргүй суралцуулах зорилготой юм.

Ингэхдээ сурагчдыг зургаан сарын хэлний бэлтгэлд сургах бөгөөд Солонгос хэлний III зэргийн онооны болзол хангах шаардлагатай юм байна. БНСУ-ын их сургуульд суралцахад банкны барьцаа, ямар нэгэн төлбөр шаардахгүй бөгөөд хамгийн гол нь тус улсад сурах чин хүсэлтэй, идэвхтэй байхад болох аж. Сурагчдыг Сүнчон-Хянг их сургуулийн харъяа сургууль болох Хүмүүнлэгийн шинжлэх ухааны их сургууль, Хансоль дээд сургууль, Глобал Бизнес дээд сургууль, Байгалийн шинжлэх ухааны дээд сургууль, Техникийн их сургууль, Эрүүл мэндийн шижлэх ухааны дээд сургуулиудад сонирхсон мэргэжлээр нь элсүүлнэ. Эхний семистрийн төлбөрөөс 100 хувь чөлөөлөх бөгөөд дараагийн семистрт тэтгэлэгтэй суралцах эсэх нь сурагчийг сурлагын онооноос хамаарна гэдгийг хэлж байна.

Одоогоор нийслэлийн 16, 19, 23, "Эрдийн өргөө" цогцолбор зэрэг сургуулиудын 100 орчим хүүхэд бүртгүүлжээ. Бүртгэл ирэх сарын 8-ныг хүртэл үргэлжлэх бөгөөд Монгол дахь солонгос хэлний сургалтыг "EDU-S" сургалтын төв хариуцан ажиллах юм байна.

Б.Лхам