Тагнуулын ерөнхий газрын дарга асан, хошууч генерал Б.Хурц өнгөрсөн сарын 29-нд 50 насныхаа төрсөн өдрийг Зайсанд байрлалтай “Buddha Vista”-гийн “Grill Studio” ресторанд тэмдэглэн өнгөрүүлжээ. Түүний төрсөн өдөрт Ерөнхий сайд асан Ч.Сайханбилэгээс эхлүүлээд Эрдэнэт үйлдвэрийн ТУЗ-ийн гишүүн асан Да.Ганболд тэргүүтэй улс төр, бизнесийн салбарын нөлөө бүхий эрхмүүд уригдан оролцжээ.

Ташрамд сонирхуулахад тагнуулын дарга асан, хошууч генерал Б.Хурцыг ШШГЕГ-ын харьяа цагдан хорих 461 дүгээр ангид саатуулаад сар гаруйн хугацаанд хорьж шалгасан билээ. Энэ хугацаанд шүүхээс түүний хорих хугацааг хоёр удаа сунгасан байдаг. Улмаар Чингэлтэй дүүргийн эрүүгийн хэргийн анхан шатны шүүхээс Б.Хурцыг батлан даалтад гаргах шийдвэр гаргасан юм. Ингэхдээ Нийслэлийн прокурорын газраас ирүүлсэн шүүгч, прокурор, мөрдөгч, хохирогч, гэрч, шинжээч, гэмт хэрэг хамтран үйлдсэн хүнийг дарамталсан, сүрдүүлсэн, эсхүл тэдгээрийн болон өөрийн амь нас, эрүүл мэндэд аюул учруулсан үндэслэл бүхий баримт, мэдээлэл байгаа гэсэн үндэслэлийг шүүх хүлээж аваагүй юм.

С.Сүлд