Энэ долоо хоногт болсон онцлох үйл явдлаас хүргэж байна.

Монгол Улсын Үндэсний статистикийн хороо, Дэлхийн банктай хамтран Өрхийн нийгэм, эдийн засгийн 2018 оны судалгааны үр дүнд үндэслэн ядуурлын төвшинг тооцон гаргасан. Үүнд Монгол Улсын хүн амын ядуурлын төвшин 2016 онд 29.6 хувь байсан бол 2018 онд 28.4 хувь болж, 1.2 хувиар буурсан байна.

Ядуурлын төвшинг аймгаар авч үзвэл, Говьсүмбэр аймгийн хүн амын талаас илүү нь буюу 51.9 хувь нь ядуу амьдарч байна гэсэн тооцоо гарчээ. Ядуурлын түвшин Говь-Алтай аймагт 45.1 хувь, Дорнод аймагт 42.5 хувь, Ховд аймагт 40.9 хувь байна. Харин ядуурлын төвшин Өмнөговь аймагт хамгийн бага буюу 11.8 хувь байна. Ядуу хүн амын тоогоор авч үзвэл,  ядуу хүн амын олонх нь буюу 378.2 мянган хүн Улаанбаатар хотод амьдарч байгаа нь ядуу хүн амын тоогоороо удаалж буй Өвөрхангай аймгаас (40.9 мянган ядуу хүн) бараг 10 дахин их байна.

Түүнчлэн залуусын дунд хар тамхи, мансууруулах бодисын хэрэглээ хэт задгайрчээ. Тодруулбал, нийслэлийн Прокурорын газар, ЦЕГ-ын Тусгай ажиллагааны газар, ЦДЦСНТ-ийн эрэлч нохойн алба, нийслэлийн дүүргүүд дэх цагдаагийн хэлтэстэй хамтран өнгөрсөн баасан, бямба гарагуудад шөнийн цэнгээний газруудад шалтгалт хийсэн юм. Энэ үеэр 40 иргэн хар тамхи, сэтгэцэт нөлөөт бодис авч явж байсан нь илэрч, зургаан хүн мансуурсан байхыг тогтоосон юм. Эндээс харахад хар тамхи, мансууруулах бодисын хэрэглээ залуусын дунд газар авч, шөнийн цэнгээний газар мансуурагчдын үүр болж байгаа аж.

Тээврийн хэрэгслийн үзлэгт заасан хугацаанд ороогүй тээврийн хэрэгслүүдэд арга хэмжээ авч эхэллээ. Мөн стандартын шаардлага хангаагүй, бүрэн бус тээврийн хэрэгсэлтэй замын хөдөлгөөнд оролцвол Зөрчлийн тухай хуулиар торгох юм.

Энэ оны хувьд 344.209 тээврийн хэрэгсэл үзлэг, оношлогоондоо хамрагдсанаас 8713 нь тэнцээгүй байна. Тэнцээгүй тээврийн хэрэгслүүд нэг сарын хугацаанд эвдрэл, гэмтлээ засан дахин техникийн үзлэгтээ хамрагдах боломжтой.

Мөн энэ долоо хоногт ШӨХТГ-аас авто үйлчилгээний байгууллагад хийсэн хяналт, шалгалтын талаар мэдээлэл хийж, Вьетнам засвар, Кузов засвар үйл ажиллагаа явуулах зөвшөөрөлгүй үйлчилгээ эрхэлсэн хэмээн мэдэгдсэн юм.

Шалгалтын явцад авто үйлчилгээний газрууд хэрэглэгчийн засвар үйлчилгээтэй холбоотой гомдлыг бүртгэдэггүй. Тэднээс ирсэн мэдээллийг шийдвэрлэх дүрэм, журам дотоодод байхгүй, татварын байгууллагад бүртгэлгүй зэрэг зөрчил түгээмэл илэрчээ. Нийслэлийн мэргэжлийн хяналтын газраас авто засваруудад 2014 оноос хойш ямар нэгэн хяналт, шалгалтын ажиллагаа явуулаагүй байна. Авто тээврийн үндэсний төв, Нийтийн тээврийн газартай уялдаа холбоогүй ажилладаг зэрэг зөрчил илэрчээ.

 Б.Лхам